Душанбе, 08 июл, – АИ «Корвон Иттилоот». Дар ноҳияи Деваштичи вилояти Суғд 7 июл Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар доираи сафари корӣ хатти нави обёрии 12-километраро ба истифода доданд. Ин иншоот яке аз ҳалқаҳои муҳими рушди инфрасохтори аграрии ноҳия ба шумор меравад, ки имрӯзҳо дар таъмини кишвар бо картошка ва дигар маҳсулоти кишоварзӣ нақши назаррас дорад.
Хатти нави обёрӣ бо маблағгузории Мақомоти иҷроияи ҳокимияти давлатии вилояти Суғд бунёд гардид. Бо ба истифода додани он майдони кишти картошка дар ноҳия то 800 гектар расонида мешавад ва дар дурнамо барои истеҳсоли беш аз 200 ҳазор тонна маҳсулоти кишоварзӣ заминаи устувор фароҳам меояд. Яъне сухан танҳо дар бораи як лоиҳаи техникист не, балки дар бораи иқдоми мушаххас дар роҳи таҳкими амнияти озуқавории кишвар меравад.
Тибқи маълумоти пешниҳодшуда, об аз мавзеи Шаршара бо истифода аз манбаъҳои табиӣ — пиряхҳои қаторкӯҳҳои баланд ва чашмасорҳои кӯҳистон — таъмин мегардад. Об тавассути қубурҳои диаметрашон 400 миллиметр ба масофаи муайян интиқол дода шуда, ҳамзамон обанбори махсус бунёд шудааст. Ин имкон дод, ки низоми муосири нигоҳдорӣ, танзим ва таъмини бефосилаи об ҷорӣ карда шавад.
Ин низом барои устувории таъмини об ва обёрӣ аҳамияти калон дошта, ҳамзамон барои беҳтар шудани сифати хизматрасонӣ ва таъмин намудани аҳолӣ бо оби босифат заминаи муҳим мегузорад. Дар шароити ноҳияҳои кӯҳӣ чунин роҳҳалҳо арзиши хос доранд, зеро маҳз дастрасӣ ба об устувории кишоварзӣ ва суръати рушди иқтисоди деҳотро муайян мекунад.
Зимни шиносоӣ ба Президенти Ҷумҳурии Тоҷикистон муҳтарам Эмомалӣ Раҳмон иттилоъ дода шуд, ки бо ба истифода додани хатти нави обёрӣ беш аз 2000 сокини маҳаллӣ бо ҷойҳои кори доимӣ ва мавсимӣ таъмин мешаванд. Ҳамин тавр, лоиҳа на танҳо хусусияти истеҳсолӣ, балки аҳамияти возеҳи иҷтимоӣ низ дорад.
Истифодаи самараноки заминҳои обёришаванда имконият фароҳам меорад, ки истеҳсоли картошка ва дигар маҳсулоти кишоварзӣ боз ҳам афзоиш ёбад. Дар ин замина лоиҳа мустақиман ба яке аз ҳадафҳои стратегии давлат — таъмини амнияти озуқаворӣ ва густариши истеҳсоли дохилӣ — пайванд мегирад.
Пас аз ифтитоҳи хатти обёрӣ Пешвои миллат муҳтарам Эмомалӣ Раҳмон бо майдонҳои васеи кишти картошка шинос шуданд. Таъкид гардид, ки ноҳияи Деваштич яке аз минтақаҳои асосии картошкапарварии ҷумҳурӣ буда, ҳамасола дар таъмини бозори дохилӣ бо ин маҳсулоти муҳим саҳми калон мегузорад.
Имсол дар ҳамаи шаклҳои хоҷагидории ноҳия картошка дар майдони 9200 гектар кишт шуда, нақшаи корҳои кишт зиёда аз 113 фоиз иҷро гардидааст. Ин нишондодҳо аз рушди устувори соҳа ва истифодаи самараноки иқтидори заминҳои кишоварзӣ шаҳодат медиҳанд.
Главаи давлат муҳтарам Эмомалӣ Раҳмон супориш доданд, ки майдони кишти картошка дар ноҳияи Деваштич то 10 ҳазор гектар расонида шавад. Татбиқи ин вазифа, тавре таъкид шуд, имкон медиҳад ҳазорон ҷойи кори нав таъсис ёбад ва имкониятҳои содироти маҳсулот ба хориҷи кишвар низ фароҳам гардад.
Сипас Пешвои миллат муҳтарам Эмомалӣ Раҳмон аз намоишгоҳи маҳсулоти кишоварзӣ, техника ва таҷҳизоти соҳавӣ, ҳунарҳои мардумӣ ва таомҳои миллӣ, ки дар ноҳияи Деваштич ташкил шуда буд, боздид намуданд. Сарвари давлат фаъолияти деҳқонон ва имкониятҳои мавҷудаи рушди минбаъдаи соҳаро баланд арзёбӣ карданд.
Дар намоишгоҳ истеҳсолкунандагони ноҳия, ки дар солҳои охир натиҷаҳои назаррас ба даст оварда, об ва заминро самаранок истифода мебаранд, дастранҷи худро ба намоиш гузоштанд. Иттилоъ дода шуд, ки то 5 июли соли ҷорӣ истеҳсоли зироатҳои ғалладона ба 15 ҳазору 540 тонна, картошка ба 9 ҳазору 197 тонна расидааст. Ҳамзамон нисбат ба ҳамин давраи соли гузашта истеҳсоли сабзавот, зироатҳои полезӣ, мева, асал, гӯшт, шир ва тухм афзоиш ёфтааст.
Гӯшаи ҳунарҳои мардумӣ ва таомҳои миллӣ низ бо завқи баланд ва маҳорати хос оро дода шуда буд. Намунаҳои маҳсули дасти ҳунармандони соҳибистеъдод, инчунин занону модарони ноҳияи Деваштич, ки намунаҳои нодири эҷодиёти мардумӣ ва таомҳои суннатиро омода кардаанд, ба намоишгоҳ рангу ҷилои вижа бахшиданд ва аз фарҳанги ғанӣ, сатҳи баланди ҳунармандӣ ва анъанаҳои деринаи меҳмоннавозии мардуми тоҷик шаҳодат доданд.
Зимни шиносоӣ бо дастранҷи деҳқонон Пешвои миллат муҳтарам Эмомалӣ Раҳмон ба шахсони масъул ва мутахассисони соҳаи кишоварзӣ оид ба таъмини истеҳсол ва захираи кофии маводи озуқа, тухмиҳои босифати навъҳои серҳосил, хӯроки чорво, баланд бардоштани иқтидори истеҳсолии хоҷагиҳо, инчунин таъмин намудани бозори дохилӣ бо маҳсулоти тару тоза ва босифат ва содироти он ба хориҷи кишвар дастуру супоришҳо доданд. Ҳамзамон ба иҷрои нақшаи кишти зироатҳои кишоварзӣ ва васеъ намудани майдони картошка таваҷҷуҳи махсус зоҳир гардид.
АКС: Хадамоти матбуоти Президенти Ҷумҳурии Тоҷикистон