Душанбе, 3 ноябр, – АИ «Корвон Иттилоот». Дар дараи Ромит 30 октябр марҳилаи дуюми лоиҳаи рушди инфрасохтори энергетикӣ идома дорад. Айни замон корҳои асосии сохтмонӣ дар зеристгоҳи «Явроз» бо шиддати 110/10 кВ ва масири хати ҳавоии интиқоли барқ анҷом дода мешаванд. Дар ин бора ширкати «Тоҷикгидроэнергомонтаж» (ТГЭМ) хабар медиҳад.

Дар ҳудуди зеристгоҳ бинои нуқтаи идоракунии умумизеристгоҳӣ сохта мешавад. Сохтмончиён бунёди ошёнаи якум, аз ҷумла плитаи болопӯши онро ба анҷом расонидаанд. Ҳамчунин, таҳкурсиҳои таҷҳизоти дастгоҳи тақсимкунандаи кушодаи 110 кВ омода ва каналҳои кабелӣ бунёд карда шудаанд.

Дар айни замон корҳои бетонрезӣ ва кандани чуқурӣ барои сохтмони иншооти ҷамъоварии равған идома доранд. Ҳамзамон, сохтмони хати ҳавоии интиқоли барқи 10 кВ барои бо неруи барқ таъмин намудани деҳаи Ёс пеш бурда мешавад. Ба майдони сохтмон аллакай сутунҳои оҳану бетонии хатти барқ оварда мешаванд.

Ба иттилои ширкат, релефи кӯҳии маҳал ба раванди иҷрои корҳои сохтмонӣ мушкилӣ эҷод мекунад ва андешидани тадбирҳои иловагии техникӣ ва ташкилотиро талаб менамояд.

Марҳилаи дуюми лоиҳа ба баланд бардоштани эътимоднокии таъминоти барқ дар Ромит ва пайваст намудани маҳалҳои аҳолинишини дурдасти кӯҳӣ ба шабакаҳои барқӣ равона шудааст. Иҷрои ин корҳо барои беҳтар намудани дастрасии сокинони деҳаҳои кӯҳистон ба неруи барқ мусоидат хоҳад кард.

Акс: ТГЭМ