Душанбе, 20 июн, – АИ «Корвон Иттилоот». Дар Тоҷикистон низоми нави ҳифзи саломатии аҳолӣ ҷорӣ мегардад, ки тибқи он ҳамаи корфармоён, новобаста аз шакли моликият, уҳдадоранд барои кормандон ҳар рӯз на камтар аз 20 дақиқа машқҳои ҷисмонӣ ташкил намоянд.

Тағйиру иловаҳои дахлдор ба Кодекси тандурустии Ҷумҳурии Тоҷикистон ворид карда шуданд. Қонун 10 июн аз ҷониби Маҷлиси намояндагон қабул гардида, 17 июн аз ҷониби Президенти Ҷумҳурии Тоҷикистон Эмомалӣ Раҳмон ба имзо расид.

Тавре вазири адлия Музаффар Ашуриён шарҳ дод, ин иқдом дар заминаи фармони Президенти Ҷумҳурии Тоҷикистон аз 14 феврали соли 2026 таҳия шуда, ба пешгирии фарбеҳӣ, диабети қанд ва таҳкими саломатии аҳолӣ равона гардидааст.

Ба гуфтаи ӯ, талаботи нав ба ҳамаи ташкилоту муассисаҳо, новобаста аз шакли фаъолият ва моликият, татбиқ мешавад. Масъулияти ташкили машқҳои мунтазами ҷисмонӣ ба зиммаи корфармоён ва шахсони мансабдор вогузор шудааст.

«Корфармоён ва шахсони масъул вазифадоранд ҳар рӯз на камтар аз 20 дақиқа машқҳои ҷисмониро ташкил ва баргузор намоянд», — таъкид намуд вазири адлия.

Тибқи талаботи нав, роҳбарони ташкилотҳо бояд на танҳо барои машғул шудан ба варзиш ва тарбияи ҷисмонӣ шароити мусоид фароҳам оваранд, балки худашон низ дар чунин фаъолиятҳо иштирок намоянд.

То имрӯз машқҳои саҳаргоҳӣ ва тарбияи ҷисмонӣ дар як қатор муассисаҳои давлатӣ, таълимӣ ва баъзе корхонаҳои хусусӣ ихтиёрӣ баргузор мегардиданд. Акнун ин таҷриба ба талаботи ҳатмии қонун табдил меёбад.

Ба андешаи коршиносон, чунин иқдом ба тамоюлҳои ҷаҳонии рушди тибби пешгирикунанда мувофиқат мекунад. Афзоиши бемориҳои ғайрисироятӣ, аз ҷумла фарбеҳӣ, диабети қанд ва бемориҳои дилу рагҳо кишварҳоро водор месозад, ки ба баланд бардоштани фаъолнокии ҷисмонии аҳолӣ таваҷҷуҳи бештар диҳанд.

Дар Тоҷикистон низ ин ташаббус бахше аз сиёсати давлатӣ дар самти тарғиби тарзи ҳаёти солим, беҳтар намудани сифати зиндагӣ ва таҳкими саломатии шаҳрвандон арзёбӣ мешавад. Интизор меравад, ки машқҳои мунтазами ҷисмонӣ дар муҳити меҳнатӣ ба беҳтар гардидани вазъи саломатӣ, коҳиши стресс, болоравии маҳсулнокии меҳнат ва ташаккули фарҳанги ҳаёти солим мусоидат намоянд.

Ҳамин тариқ, фаъолнокии ҷисмонӣ дар ҷойи кор аз тавсияи тиббӣ ба яке аз унсурҳои ҳатмии ташкили раванди меҳнат дар кишвар табдил меёбад.

АКС: https://minval.az/