Душанбе, 03 июл, – АИ «Корвон Иттилоот». Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ 02 июл  бо Раиси Маҷлиси Шӯрои Шоҳигарии Арабистони Саудӣ доктор Абдуллоҳ ибни Муҳаммад ибни Иброҳим Оли аш-Шайх, ки бо сафари расмӣ ба Ҷумҳурии Тоҷикистон ташриф овардааст, мулоқоти расмӣ баргузор намуд.

Зимни мулоқот ҷонибҳо вазъи кунунӣ ва дурнамои рушди муносибатҳои дуҷонибаи Душанбе ва Эр-Риёзро ҳамаҷониба баррасӣ карданд. Таваҷҷуҳи асосӣ ба таҳкими ҳамкориҳои байнипарлумонӣ равона гардид, ки метавонад барои густариши ҳамкориҳои амалӣ дар соҳаҳои тиҷоративу иқтисодӣ, сармоягузорӣ, фарҳангӣ ва башардӯстона заминаи мусоид фароҳам оварад.

Сафари расмии доктор Оли аш-Шайх ба Душанбе ва музокироти ӯ бо Рустами Эмомалӣ аз таваҷҷуҳи ҷиддии Арабистони Саудӣ ба таҳкими мавқеи геоиқтисодии худ дар Осиёи Марказӣ шаҳодат медиҳад. Барои Тоҷикистон Эр-Риёз на танҳо яке аз шарикони муҳими ҷаҳони ислом, балки яке аз сармоягузорони муҳими рушд ба шумор меравад, ки тавассути Фонди рушди Арабистони Саудӣ метавонад ба татбиқи лоиҳаҳои стратегии зерсохторӣ ва гидроэнергетикии кишвар мусоидат намояд.

Барои ИА «Корвон Иттилоот» маълум аст, ки ҳамзамон иҷро намудани вазифаҳои Раиси Маҷлиси миллӣ ва Раиси шаҳри Душанбе аз ҷониби Рустами Эмомалӣ имкон медиҳад, ки созишҳои байнидавлатӣ ба татбиқи лоиҳаҳои мушаххаси шаҳрӣ ва минтақавӣ пайванд дода шаванд. Муколамаи мустақими қонунгузорони ду кишвар заминаи устувори ҳуқуқӣ ва танзимиро барои коҳиш додани хавфҳои сармоягузорони бузурги саудӣ ва ҷалби сармояи хусусӣ фароҳам меорад.

Дар пасманзари татбиқи Стратегияи «Vision 2030» дар Арабистони Саудӣ ва суръат гирифтани рушди энергетикаи «сабз» ва долонҳои байналмилалии нақлиётиву логистикӣ дар Тоҷикистон, таҳкими робитаҳои Душанбе ва Эр-Риёз метавонад ба таъсиси кластерҳои нави саноатии муштарак, густариши ҳамкориҳои сармоягузорӣ ва тавсеаи мубодилаи башардӯстона мусоидат намояд.

Ин раванд мавқеи Тоҷикистонро ҳамчун шарики боэътимод ва пешгӯишаванда дар минтақаи Ховари Миёна боз ҳам таҳким мебахшад.

АКС: Канали Telegram-и Раиси шаҳри Душанбе