Душанбе, 20 июл, – АИ «Корвон Иттилоот». Дастгирии ташаббусҳои соҳибкорӣ ва фаъолияти иқтисодии занон дар Тоҷикистон ҳамчун яке аз самтҳои муҳими сиёсати иҷтимоии давлат идома дорад. Имрӯз дар Кумитаи кор бо занон ва оилаи назди Ҳукумати Ҷумҳурии Тоҷикистон маросими дипломсупорӣ ба ғолибони гранти Президенти Ҷумҳурии Тоҷикистон барои соли 2026 баргузор гардид.

Дар доираи чорабинӣ ба 200 нафар занон, ки лоиҳаҳои онҳо барои гирифтани гранти президентӣ интихоб гардиданд, дипломҳо супорида шуданд. Ин дастгирӣ ба рушди фаъолияти соҳибкорӣ, татбиқи ғояҳои истеҳсолӣ ва густариши имкониятҳои иқтисодии занон дар минтақаҳои кишвар равона шудааст.

Раиси Кумитаи кор бо занон ва оилаи назди Ҳукумати Ҷумҳурии Тоҷикистон Бунафша Файзиддинзода зимни суханронӣ таъкид намуд, ки чунин иқдомҳои дастгирии давлатӣ барои беҳтар гардидани сатҳи зиндагии аҳолӣ ва фароҳам овардани шароити мусоид барои иштироки фаъолонаи занон дар рушди иқтисоди миллӣ мусоидат мекунанд.

Ба гуфтаи ӯ, имрӯз занони Тоҷикистон дар соҳаҳои гуногун бо фаъолияти созанда иштирок намуда, дар рушди истеҳсолот, соҳибкорӣ ва таҳкими заминаҳои иқтисодии ҷомеа саҳми арзанда мегузоранд.

Тибқи маълумот, ҳаҷми грантҳои Президенти Ҷумҳурии Тоҷикистон дар солҳои охир ба таври назаррас афзоиш ёфтааст. Агар соли 2024 барои дастгирии занони соҳибкор 120 грант ба маблағи 5 миллион сомонӣ ҷудо шуда бошад, пас соли 2025 тибқи қарори Ҳукумати Ҷумҳурии Тоҷикистон шумораи грантҳо то 200 адад ва маблағи умумии онҳо то 15 миллион сомонӣ расонида шуд.

Яъне, ҳаҷми маблағгузории грантҳои президентӣ дар муқоиса бо соли қаблӣ се баробар зиёд гардид.

Мувофиқи қарори мазкур, аз соли 2025 то соли 2030 ҳамасола 200 гранти Президенти Ҷумҳурии Тоҷикистон ба маблағи умумии 15 миллион сомонӣ ҷудо карда мешавад. Ин маблағҳо барои дастгирӣ ва рушди фаъолияти соҳибкории занон, татбиқи лоиҳаҳои истеҳсолӣ, хизматрасонӣ ва дигар самтҳои иқтисодӣ пешбинӣ шудаанд.

Тақвияти нақши занон дар иқтисоди миллӣ яке аз омилҳои муҳими рушди устувори ҷомеа ба ҳисоб меравад. Барномаи грантҳои президентӣ дар Тоҷикистон на танҳо ҳамчун воситаи дастгирии молиявӣ, балки ҳамчун механизми фароҳам овардани имкониятҳои нав барои соҳибкорӣ, шуғл ва баланд бардоштани фаъолнокии иқтисодии занон арзёбӣ мешавад.

Афзоиши ҳаҷм ва шумораи грантҳо нишон медиҳад, ки сиёсати давлатӣ ба рушди соҳибкории хурду миёна, бахусус дар байни занон, таваҷҷуҳи бештар зоҳир менамояд. Лоиҳаҳое, ки тавассути ин грантҳо амалӣ мешаванд, метавонанд ба ташкили ҷойҳои нави корӣ, рушди истеҳсолоти маҳаллӣ ва тақвияти иқтисоди оилавӣ мусоидат намоянд.

Дар шароити татбиқи ҳадафҳои стратегии кишвар, баланд бардоштани иштироки занон дар ҳаёти иқтисодӣ ва иҷтимоӣ ба яке аз самтҳои калидии рушди Тоҷикистон табдил ёфтааст.

Акс: Кумитаи кор бо занон ва оилаи назди Ҳукумати Ҷумҳурии Тоҷикистон