Душанбе, 27 август, – АИ «Корвон Иттилоот». Низомиёни пойгоҳи ҳарбии гвардиявии 201-ум дар якҷоягӣ бо намояндагони шуъбаи ҳудудии филиали «Марказӣ»-и Муассисаи давлатии федералии худмухтори «Росжилкомплекс» ва иштирокдорони Ҳаракати умумиҷаҳонии ҳарбию ватандӯстии «Юнармия» аз собиқадори Ҷанги Бузурги Ватанӣ Сафаралӣ Файзалиев аёдат намуда, ӯро ба муносибати 83-юмин солгарди шикасти неруҳои истилогари фашистии Германия аз ҷониби Артиши Шӯравӣ дар Ҷанги Курск табрик карданд ва ба ӯ барои корнамоии ҷангӣ изҳори сипоси самимӣ намуданд.
Меҳмонон ба деҳаи Хоҷа-Шариф, воқеъ дар наздикии шаҳри Бохтар, омада, бо собиқадор мулоқоти гарму самимӣ анҷом доданд. Низомиён ва аъзои «Юнармия» ба Сафаралӣ Файзалиев туҳфаҳои хотиравӣ ва бастаҳои маҳсулоти ғизоӣ тақдим намуда, муҳимтар аз ҳама, ӯро бо таваҷҷуҳ ва ғамхории инсонӣ фаро гирифтанд.
Зимни суҳбат собиқадор бо ҷавонон хотираҳои солҳои ҷангиро ба миён гузошта, дар бораи озмоишҳои сангини наслаш ва воқеаҳои ҷангие, ки дар онҳо ҳанӯз дар синни ҷавонӣ иштирок карда буд, нақл кард.
Барои юнармейҳо ин мулоқот имконият фароҳам овард, ки таърихро на танҳо аз саҳифаҳои китобҳои дарсӣ, балки бевосита аз забони шахсе бишнаванд, ки ҷангро аз сар гузаронидааст. Низомиён ва ҷавонони иштирокдори мулоқот аз таҳти дил ба собиқадор барои ҷасорат, матонат ва фидокорӣ дар мубориза бар зидди фашизм изҳори сипос карданд.
Сафаралӣ Файзалиев 9 майи соли 1923 ба дунё омадааст. Ӯ дар синни 18-солагӣ ба сафи полки 229-уми Сурхи Байрақдор шомил шуда, дар ҳайати неруҳои шӯравӣ дар Фронти Украина хизмат кардааст.
Дар солҳои Ҷанги Бузурги Ватанӣ ӯ дар Ҷанги Курск, набардҳо барои Воронеж, Киев ва дигар маҳалҳои аҳолинишин иштирок кардааст. Барои ҷасорату корнамоиҳои ҳарбӣ дар майдони набард бо ордени Ҷанги Ватанӣ дараҷаи II сарфароз гардонида шудааст.
9 майи соли 2026 собиқадори ҷанг 103-солагии зодрӯзашро таҷлил намуда, ба куҳансолтарин собиқадори Ҷанги Бузурги Ватанӣ дар Тоҷикистон табдил ёфт.
Дар паси ин рақамҳо сарнавишти пурраи як инсон меистад: ҷавоние, ки солҳои худро дар оташи ҷанг гузаронидааст, солҳои фаъолияти осоишта ва роҳи тӯлонии зиндагие, ки имрӯз пайванди зиндаи миёни гузаштаҳои ҷангӣ ва насли имрӯза мебошад.
Шефии низомиёни пойгоҳи ҳарбии гвардиявии 201-ум нисбат ба собиқадор хусусияти мунтазам дорад. Барои Сафаралӣ Файзалиев чунин мулоқотҳо танҳо дастгирии моддӣ нестанд. Ин пеш аз ҳама имкони муошират бо намояндагони наслҳои гуногун, нақл кардани хотираҳои гузашта ва эҳсоси он аст, ки корнамоии ӯ ҳанӯз ҳам дар ёдҳо боқӣ монда, қадр карда мешавад.
Мулоқот бо собиқадорони Ҷанги Бузурги Ватанӣ дар шароите аҳамияти хос пайдо мекунад, ки насли бевоситаи иштирокдорони он рӯйдодҳо тадриҷан аз миён меравад. Нақли зиндаи собиқадори ҷанг шаҳодати нодири таърихиест, ки онро пурра бо ҳуҷҷатҳо, аксҳо ва маводи бойгонӣ иваз кардан ғайриимкон аст.
Дар ҳифзи ин хотира ҷавонон нақши махсус доранд. Барои юнармейҳо муоширати мустақим бо собиқадор омӯзиши таърихро ба таҷрибаи шахсии иртибот бо насли Ғалаба табдил медиҳад. Чунин мулоқотҳо барои дарки амиқтари арзиши сулҳ, аҳамияти ҷасорат ва масъулият дар назди наслҳои оянда мусоидат мекунанд.
Иштироки муштараки низомиён, намояндагони сохторҳои иҷтимоӣ ва ҷавонон дар қадрдонии собиқадор ҳамчунин умумияти хотираи таърихии халқҳои Русия ва Тоҷикистон-ро таъкид менамояд. Корнамоии сарбозони шӯравӣ, ки дар фронтҳои гуногуни Ҷанги Бузурги Ватанӣ ҷангидаанд, бахше аз таърихи муштарак боқӣ монда, наслҳо ва халқҳоро ба ҳам мепайвандад.
Дар сухани ҷавобӣ Сафаралӣ Файзалиев ба фармондеҳии пойгоҳи ҳарбии гвардиявии 201-ум барои таваҷҷуҳ, ғамхорӣ ва дастгирии пайваста изҳори сипос намуд.
Мулоқот дар Хоҷа-Шариф танҳо арҷгузорӣ ба собиқадор набуд. Он бори дигар ёдовар шуд, ки то замоне ки иштирокдорони бевоситаи ҷанг зиндаанд, хотираи Ғалабаи Бузург низ зинда боқӣ мемонад. Ғамхорӣ ба онҳо, таваҷҷуҳи ҷавонон ва фароҳам овардани имкони интиқоли хотираҳои ҷангӣ ба наслҳои оянда бахши муҳими ҳифзи ин хотираи таърихӣ мебошад.
Акс: Шуъбаи ҳамкории ҳарбӣ- шаҳрвандии Пойгоҳи ҳарбии 201-уми Русия