Душанбе, 08 июн, – АИ «Корвон Иттилоот». Дар доираи Форуми байналмилалии иқтисодии Санкт-Петербург (ПМЭФ-2026) ҷаласаи сатҳи баланд дар мавзӯи «Ояндаи рақамӣ: самтҳои умумии рушд, чолишҳо ва роҳҳои ҳалли онҳо» баргузор гардид. Дар кори он Роҳбари Хадамоти алоқаи назди Ҳукумати Ҷумҳурии Тоҷикистон Исфандиёр Саъдулло иштирок ва суханронӣ намуд.

Чорабинӣ ба яке аз минбарҳои муҳими форум табдил ёфт, ки дар он масъалаҳои стратегияи таҳаввулоти рақамӣ, рушди инфрасохтори телекоммуникатсионӣ ва ташаккули моделҳои нави ҳамкории байнидавлатӣ дар соҳаи рақамӣ баррасӣ шуданд.

Дар суханронии худ роҳбари Хадамоти алоқа ба самтҳои афзалиятноки рушди рақамии Тоҷикистон таваҷҷуҳи махсус зоҳир намуд. Аз ҷумла, густариши шабакаҳои телекоммуникатсионӣ, навсозии инфрасохтори рақамӣ, ҷорӣ намудани технологияҳои муосир, аз ҷумла зеҳни сунъӣ, инчунин баланд бардоштани сифат ва дастрасии хизматрасониҳои рақамӣ барои аҳолӣ ва бахши хусусӣ таъкид гардид.

Ҳамзамон таъкид шуд, ки дар шароити суръатёбии раванди рақамикунонии иқтисодиёт дастрасӣ ба интернети босифат ва рушди инфрасохтори муосири алоқа на танҳо як самти технологӣ, балки омили муҳими рушди иҷтимоиву иқтисодии давлат ба ҳисоб меравад.

Дар кори ҷаласа инчунин намояндагони сохторҳои соҳавии кишварҳои минтақа, аз ҷумла вазирон ва роҳбарони идораҳои рақамӣ ва коммуникатсионии Беларус, Туркманистон, Русия, Узбекистон, Қазоқистон ва Қирғизистон иштирок намуданд. Ин ба муҳокима хусусияти минтақавӣ дода, манфиати умумии кишварҳоро ба ҳамоҳангсозии сиёсати рақамӣ нишон дод.

Дар маркази музокирот масъалаҳои соҳибихтиёрии технологӣ, ташаккули инфрасохтори ягонаи рақамӣ, ҳамоҳангсозии сиёсати танзимӣ ва густариши ҳамкории байнидавлатӣ дар соҳаи технологияҳои иттилоотӣ ва коммуникатсионӣ қарор доштанд.

Иштирокчиён таъкид карданд, ки рушди ҳамкории рақамӣ ва табодули таҷриба миёни кишварҳои минтақа ба омили калидии баланд бардоштани рақобатпазирии иқтисодҳои миллӣ ва ташаккули фазои устувору ҳамгирошудаи рақамӣ табдил меёбад.

ПМЭФ-2026 бори дигар собит намуд, ки рӯзномаи рақамӣ аз доираи стратегияҳои миллӣ берун рафта, торафт бештар ҳамчун афзалияти минтақавӣ ва байналмилалӣ шакл мегирад.

АКС: Хадамоти алоқаи назди Ҳукумати Ҷумҳурии Тоҷикистон