Душанбе, 14 май, – АИ «Корвон Иттилоот». Муколамаи Президенти Ҷумҳурии Тоҷикистон, Пешвои миллат Эмомалӣ Раҳмон бо Раиси Ҷумҳурии Мардумии Чин Си Ҷинпин 12 май дар Пекин собит намуд, ки муносибатҳои Тоҷикистону Чин ба сатҳи ҳамкории устувор, бисёрсамта ва дарозмуддат расидаанд. Ин раванд на танҳо ба эътимоди сиёсӣ, балки ба манфиати муштараки рушд, амният ва навсозии технологӣ такя мекунад.

Музокирот нахуст дар ҳайати васеъ ва сипас дар доираи маҳдуд баргузор шуда, дар фазои ҳамдигарфаҳмии комил ва эътимоди амиқ сурат гирифт. Си Ҷинпин Эмомалӣ Раҳмонро дӯсти азизи худ номида, саҳми ӯро дар таҳкими пояҳои давлатдорӣ ва рушди Тоҷикистон баланд арзёбӣ кард. Ӯ таъкид намуд, ки бо вуҷуди нооромии ҷаҳони муосир, Чин ва Тоҷикистон ҳамсоягони нек, дӯстони хуб ва шарикони боэътимод боқӣ хоҳанд монд.

Эмомалӣ Раҳмон аз даъват, истиқболи гарм ва меҳмоннавозии анъанавӣ изҳори сипос намуда, рушди босуръати робитаҳоро дар чаҳорчӯби шарикии стратегии ҳамаҷониба таъкид кард. Дар маркази гуфтугӯ соҳаҳои иқтисод қарор доштанд: афзоиши гардиши мол, сармоягузориҳои чинӣ, ҳамкорӣ дар саноат, энергетика, кишоварзӣ ва инфрасохтор. Таъкид шуд, ки Чин дар миёни шарикони берунии иқтисодии Тоҷикистон ҷойгоҳи пешсаф дорад ва дар кишвар беш аз 700 корхона бо сармояи чинӣ фаъолият мекунад.

Саҳмҳои нав дар иқтисоди сабз, рақамисозӣ, зеҳни сунъӣ, сайёҳӣ, табодули фарҳангӣ ва таълимӣ низ баррасӣ шуданд. Ба масъалаҳои амният — мубориза бо терроризм, ифротгароӣ, киберҷинояткорӣ ва қочоқи маводи мухаддир дар чаҳорчӯби СММ, СҲШ ва механизми «Осиёи Марказӣ — Чин» — диққати махсус дода шуд.

Эмомалӣ Раҳмон мавқеи қатъии Тоҷикистонро дар ҳалли мусолиматомези низоъҳо, аз ҷумла атрофи Эрон ва масъалаи Афғонистон, тасдиқ кард. Дар анҷом ӯ Си Ҷинпинро барои сафари ҷавобӣ ба Тоҷикистон даъват намуд.

АКС: Хадамоти матбуоти Президенти Ҷумхурии Тоҷикистон