Душанбе, 13 май, – АИ «Корвон Иттилоот». Дар доираи сафари давлатии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Ҷумҳурии Мардумии Чин дар шаҳри Пекин мулоқоти Сарвари давлати Тоҷикистон бо Сарвазири Шӯрои давлатии ин кишвари дӯст господин Ли Цян баргузор гардид.

Муҳтарам Эмомалӣ Раҳмон таъкид намуд, ки «Чин барои мо ҳамеша кишвари дӯст, ҳамсояи нек ва шарики боэътимоди стратегӣ боқӣ мемонад».

Зимни мулоқот зикр гардид, ки соли 2025 ҳаҷми гардиши мол миёни ду кишвар нисбат ба соли 2024 қариб 46 фоиз афзоиш ёфтааст. Ҳамчунин сармоягузориҳои Чин ба иқтисоди Тоҷикистон дар солҳои 2007–2024 ба қариб 6 миллиард доллари ИМА расида, қисми зиёди онро сармоягузориҳои мустақим ташкил медиҳанд.

Фаъолияти самараноки беш аз 700 ширкати дорои сармояи чинӣ ҳамчун намунаи возеҳи сатҳи баланди эътимод миёни доираҳои соҳибкории ду кишвар арзёбӣ гардид.

Таъкид шуд, ки сармоягузориҳои Чин ба бахшҳои гуногуни саноат, аз ҷумла ба саноати кӯҳӣ, инчунин ба соҳаҳои энергетика, нақлиёт, сохтмон ва кишоварзӣ рӯ ба афзоиш доранд.

Ҳамчунин зикр гардид, ки Тоҷикистон ба ҷалби сармояи Чин барои татбиқи лоиҳаҳо ва барномаҳо дар самтҳои рақамисозӣ, ҷорӣ намудани зеҳни сунъӣ, технологияҳои муосир, рушди иқтисоди «сабз», энергетика ва саноат низ манфиатдор мебошад.

Дар ҷараёни мулоқот табодули судманди афкор оид ба идомаи татбиқи лоиҳаҳои бузург дар бахшҳои воқеии иқтисоди миллии Тоҷикистон, аз ҷумла энергетика, роҳсозӣ, саноат, кишоварзӣ, инчунин роҳҳои афзоиши содироти маҳсулоти аграрӣ ва агросаноатии Тоҷикистон ба бозори Чин, таъсиси боғи инноватсионии илмӣ-технологии аграрии ду кишвар дар Тоҷикистон ва дигар масъалаҳои мавриди таваҷҷуҳи муштарак сурат гирифт.

АКС: Хадамоти матбуоти Президенти Ҷумҳурии Тоҷикистон