Душанбе, 31 август, – АИ «Корвон Иттилоот». 29 август, дар арафаи таҷлили 35-солагии Истиқлоли давлатии Ҷумҳурии Тоҷикистон, миёни Душанбе ва Минск хатсайри мустақими ҳавоӣ ифтитоҳ гардид. Хатсайри нав аз ҷониби Агентии авиатсияи граждании назди Ҳукумати Ҷумҳурии Тоҷикистон дар ҳамкорӣ бо ҶДММ «Ширкати ҳавопаймоии «Сомон Эйр»» роҳандозӣ шуд.

Ифтитоҳи парвози мустақими ҳавоӣ ҳамчун қадами навбатӣ дар рушди муносибатҳои гуногунҷониба миёни Тоҷикистон ва Беларус арзёбӣ мешавад. Ба роҳ мондани иртиботи мустақими ҳавоӣ метавонад барои густариши робитаҳо дар соҳаҳои иқтисоду тиҷорат, рушди сайёҳӣ ва табодули фарҳангӣ, инчунин фароҳам овардани шароити қулайтар барои рафтуомади шаҳрвандони ду кишвар мусоидат намояд.

Барои Душанбе хатсайри нав аҳамияти васеи нақлиётӣ низ дорад. Васеъ гардидани шабакаи байналмилалии хатсайрҳои ҳавоӣ пайвастагии нақлиётии Тоҷикистонро бо кишварҳои хориҷӣ таҳким бахшида, имкониятҳои кишварро барои рушди ҷараёни сайёҳӣ ва робитаҳои корӣ афзоиш медиҳад.

Ифтитоҳи хатсайри Душанбе — Минск дар пасманзари навсозӣ ва васеъ намудани парки ҳавопаймоии «Сомон Эйр» сурат мегирад. Дар аввали моҳи август парки ҳавопаймоии ширкат бо як ҳавопаймои муосири Boeing 737-8 MAX пурра гардид. Тибқи нақша, моҳи сентябр ворид шудани боз як ҳавопаймои ин навъи муосир дар назар аст.

Васеъ гардидани парки ҳавопаймоӣ дар навбати худ барои зиёд намудани шумораи самтҳои байналмилалӣ замина фароҳам меорад. «Сомон Эйр» нақша дорад, ки ҳавопаймоҳои навро барои иҷрои парвозҳо ба як қатор самтҳои ояндадори байналмилалӣ, аз ҷумла Душанбе — Сеул, Душанбе — Пекин ва Душанбе — Лондон истифода барад.

Ҳамин тариқ, роҳандозии хатсайри Душанбе — Минск ба раванди васеъ гардидани ҷуғрофияи байналмилалии авиатсияи граждании Тоҷикистон мутобиқ мебошад. Хатсайрҳои нав метавонанд на танҳо рафтуомади шаҳрвандонро осон намоянд, балки ба рушди тиҷорат, робитаҳои сармоягузорӣ, сайёҳӣ ва ҳамкориҳои гуманитарӣ низ мусоидат кунанд.

Дар Агентии авиатсияи гражданӣ таъкид менамоянд, ки корҳо барои рушди соҳа, тавсеаи ҳамкориҳои байналмилалӣ ва ифтитоҳи хатсайрҳои нави ҳавоӣ бо кишварҳои хориҷӣ идома дода мешаванд. Яке аз вазифаҳои стратегӣ таҳкими иқтидори нақлиётию транзитии Тоҷикистон мебошад.

Рушди авиатсияи гражданӣ ҳамчун яке аз бахшҳои муҳими инфрасохтори муосири нақлиётии кишвар арзёбӣ мегардад. Дар солҳои истиқлолият бо таваҷҷуҳ ва дастгирии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон барои рушди марҳилавии соҳа ва густариши робитаҳои байналмилалии ҳавоии кишвар шароити мусоид фароҳам оварда шудааст.

Ифтитоҳи хатсайри мустақими Душанбе — Минск на танҳо як самти нави парвозҳо дар харитаи байналмилалии авиатсияи Тоҷикистон, балки як канали иловагии таҳкими робитаҳои амалӣ миёни ду кишвар мебошад.

Акс: АМИТ «Ховар»