Душанбе, 01 июл, – АИ «Корвон Иттилоот». Дар яке аз муҳимтарин шоҳроҳҳои Тоҷикистон — роҳи Душанбе — Чаноқ — корҳои васеи таъмири ҷорӣ ва асосӣ идома доранд.
Навсозии мунтазами роҳ имкон медиҳад, ки ҳаракати бемамониати нақлиёт дар масири калидии кишвар таъмин гардида, робитаи пойтахт бо минтақаҳои шимолӣ ва нақши Тоҷикистон дар шабакаҳои минтақавии нақлиётӣ боз ҳам таҳким ёбад.
Ба иттилои ширкати IRS, маъракаи таъмири роҳ ҳамасола бо фаро расидани мавсими мусоиди обу ҳаво оғоз шуда, ҳамаи корҳои асфалтпӯшкунӣ ва барқарорсозии қитъаҳои осебдида мутобиқи меъёрҳои муосири сифат анҷом дода мешаванд.
Хусусияти асосии роҳи Душанбе — Чаноқ дар он аст, ки он аз минтақаҳои кӯҳии дорои шароити мураккаби табиӣ мегузарад. Аз ин рӯ, нигоҳдории он дар тамоми фаслҳои сол назорати доимӣ талаб мекунад. Дар фасли зимистон кормандони ширкат тармафароӣ, тоза намудани роҳ аз барф, коркарди рӯйпӯш бо маводи зиддилағзиш ва расонидани кумак ба ронандагонро анҷом медиҳанд. Дар фасли гармо бошад, корҳои таъмири асосӣ ва ҷорӣ, бартарафсозии оқибатҳои селу боришоти шадид, сангрезӣ ва соҳилмустаҳкамкунӣ дар меҳвари фаъолият қарор доранд.
Тавре мушоҳидаҳо ва назарҳои ронандагон дар шабакаҳои иҷтимоӣ нишон медиҳанд, роҳи Душанбе — Чаноқ имрӯз яке аз роҳҳои беҳтарин нигоҳдоришавандаи кишвар ба ҳисоб меравад. Бо вуҷуди ин, таъсири иқлими кӯҳӣ ва ҳаракати пуршиддати нақлиёт боиси фарсудашавии баъзе қитъаҳо гардида, таҷдиди пурраи онҳоро талаб мекунад.
Омори корҳои анҷомшуда аз ҳаҷми бузурги сармоягузорӣ шаҳодат медиҳад. Агар соли 2012 барои таъмири роҳ 2 ҳазор тонна асфалт истифода шуда бошад, соли 2013 ин нишондиҳанда ба 6 ҳазор тонна, соли 2014 ба 10 ҳазор тонна ва соли 2015 ба 15 ҳазор тонна расид. Солҳои баъдӣ ҳаҷми кор боз ҳам афзоиш ёфта, соли 2017 — 51 ҳазору 551 тонна, соли 2019 — 49 ҳазору 862 тонна ва соли 2021 ба рекордии 55 ҳазору 366 тонна баробар гардид.
Танҳо дар соли 2025 барои таъмири роҳ 25 ҳазору 204 тонна асфалт истифода шудааст. Дар маҷмӯъ, аз оғози амалисозии барномаи навсозӣ барои таъмиру таҷдиди ин шоҳроҳ қариб 400 ҳазор тонна омехтаи асфалт масраф шудааст.
Имрӯз корҳои таъмирӣ бо суръати баланд идома дошта, ҳаҷми онҳо дар сатҳи солҳои гузашта нигоҳ дошта мешавад.
Рушди роҳи Душанбе — Чаноқ танҳо ба беҳтарсозии инфрасохтори роҳ маҳдуд намешавад. Ин шоҳроҳи стратегӣ пайвастагии нақлиётии байни минтақаҳои кишварро таъмин намуда, ба рушди савдо, сайёҳӣ ва соҳибкорӣ мусоидат мекунад, амнияти ҳамлу нақлро баланд мебардорад ва иқтидори транзитии Тоҷикистонро тақвият мебахшад. Дар шароити рушди босуръати долонҳои байналмилалии нақлиётӣ, нигоҳдории ин роҳ мутобиқ ба меъёрҳои муосир ба яке аз омилҳои муҳими таъмини рушди устувори иҷтимоию иқтисодии кишвар табдил ёфтааст.
АКС: IRS