Душанбе, 17 сентябр, – АИ «Корвон Иттилоот». 16 сентябр дар шаҳри Сеул нахустин ҳамоиши роҳбарони давлатҳо дар доираи «Осиёи Марказӣ — Ҷумҳурии Корея» баргузор шуд, ки марҳилаи нави ҳамкории минтақавиро дар соҳаҳои сиёсӣ, тиҷоративу иқтисодӣ ва технологӣ оғоз кард.

Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар кори ҳамоиш иштирок намуда, ташаббусҳои асосии Душанбе дар самти густариши ҳамкориҳоро пешниҳод кард. Дар натиҷаи мулоқот роҳбарони кишварҳо Эъломияи Сеул-ро қабул намуданд.

Баргузории ҳамоиш дар сатҳи роҳбарони давлатҳо марҳилаи нави рушди Форуми ҳамкории «Осиёи Марказӣ — Ҷумҳурии Корея» ба ҳисоб меравад, ки то имрӯз ҳамчун майдони муколамаи мунтазам фаъолият мекард. Ба сатҳи олии сиёсӣ баровардани ин ҳамкорӣ аз талошҳои ҷонибҳо барои густариши шарикии амалӣ ва ташкили механизмҳои устувори ҳамкорӣ дар масъалаҳои иқтисодӣ, амният ва рушди устувор шаҳодат медиҳад.

Аз муколамаи минтақавӣ то ҳамкории стратегии амалӣ

Дар суханронии худ Эмомалӣ Раҳмон ташаббуси Кореяи Ҷанубӣ — «Сиёсати нави шимолӣ»-ро баланд арзёбӣ намуда, онро воситаи тавсеаи ҳамкории технологӣ ва иқтисодии Осиёи Марказӣ бо Ҷумҳурии Корея донист.

Президенти Тоҷикистон як қатор самтҳои асосии ҳамкории дарозмуддатро муайян кард. Аз ҷумла, сухан дар бораи тақвияти минбаъдаи заминаи институтсионалии муносибатҳо пас аз ба сатҳи роҳбарони давлатҳо баромадани ҳамкорӣ, амиқсозии робитаҳои иқтисодӣ ва ташаккули занҷираҳои боэътимод ва устувори истеҳсоливу логистикӣ меравад.

Барои кишварҳои Осиёи Марказӣ, ки дар маркази тағйироти низоми нақлиётӣ ва тиҷоратии минтақа қарор доранд, масъалаҳои диверсификатсияи роҳҳои интиқол, устувории таъминот ва рушди ҳамкориҳои нави истеҳсолӣ аҳамияти бештар пайдо мекунанд. Дар ин замина иқтидори технологӣ ва сармоягузории Ҷумҳурии Корея метавонад яке аз захираҳои муҳими навсозии иқтисод ва густариши имкониятҳои тиҷоративу иқтисодии минтақа бошад.

Дар суханронии Сарвари давлат масъалаҳои рӯзномаи байналмилалӣ низ ҷойи муҳим доштанд. Эмомалӣ Раҳмон дастгирии Созмони Милали Муттаҳидро аз ташаббуси Душанбе оид ба эълон намудани «Даҳсолаи таҳкими сулҳ ба хотири наслҳои оянда (2027–2036)» ёдовар шуда, зарурати муттаҳид намудани талошҳои давлатҳоро дар муқовимат ба таҳдиду монеаҳои муосир, ки ба суботи байналмилалӣ таъсир мерасонанд, таъкид кард.

Об, пиряхҳо ва амнияти иқлимӣ

Қисмати муҳими суханронӣ ба рӯзномаи экологӣ ва иқлимӣ бахшида шуд. Дар миёни масъалаҳои афзалиятнок мушкилоти норасоии оби ошомиданӣ, обшавии босуръати пиряхҳо ва паёмадҳои манфии тағйирёбии иқлим номбар гардиданд.

Барои Тоҷикистон, ки дорои захираҳои бузурги оби тоза буда, ҳамзамон ҳамчун кишвари кӯҳистонии минтақа ба таъсири тағйирёбии иқлим осебпазир мебошад, масъалаҳои об ва пиряхҳо аҳамияти махсус доранд. Аз ин рӯ, ба рӯзномаи ҳамоиши Сеул ворид шудани ин масъалаҳо имкон медиҳад, ки афзалиятҳои минтақа бо ҳадафҳои васеътари рушди устувори ҷаҳонӣ пайваст карда шаванд.

Қабули Эъломияи Сеул натиҷаи асосии сиёсии вохӯрӣ гардид. Ин санад барои рушди минбаъдаи муносибатҳои кишварҳои Осиёи Марказӣ ва Ҷумҳурии Корея замина фароҳам оварда, сатҳи нави ҳамкории бисёрҷонибаи онҳоро таҳким мебахшад.

Барои Тоҷикистон натиҷаҳои ҳамоиш имкониятҳои иловагӣ барои пешбурди афзалиятҳои иқтисодӣ, ҷалби сармоя ва технологияҳои кореягӣ ва густариши ҳамкорӣ дар самтҳои истеҳсолӣ, инфрасохторӣ ва инноватсионӣ фароҳам месозад.

Нахустин ҳамоиши «Осиёи Марказӣ — Ҷумҳурии Корея» ба ин тартиб на танҳо як рӯйдоди муҳими дипломатӣ, балки майдони ташаккули шарикии низоммандтари иқтисодӣ ва технологӣ миёни ду минтақа гардид.

ФОТО: Хадамоти матбуоти Президенти Ҷумҳурии Тоҷикистон