Душанбе, 14 июл, – АИ «Корвон Иттилоот». Вазорати нақлиёти Ҷумҳурии Тоҷикистон татбиқи яке аз бузургтарин барномаҳои таҷдид ва сохтмони роҳҳои автомобилгардро оғоз намудааст, ки ҳадафи он таҳкими робитаҳои байни минтақаҳои кишвар ва баланд бардоштани иқтидори транзитии ҷумҳурӣ мебошад.

Айни замон тавассути вазорат 11 лоиҳаи давлатии сармоягузорӣ ба маблағи умумии қариб 1,2 миллиард доллари ИМА амалӣ карда мешаванд. Сохтори маблағгузории онҳо мутавозин буда, 742,9 миллион долларро грантҳо ва кӯмакҳои техникии бебозгашт, 342,5 миллион долларро маблағҳои қарзӣ ва 85,1 миллион долларро саҳми буҷети давлатии Ҷумҳурии Тоҷикистон ташкил медиҳад.

Аз шумораи умумии лоиҳаҳо панҷ лоиҳа ба маблағи 590,3 миллион доллар дар марҳилаи фаъоли корҳои сохтмонӣ қарор дошта, шаш лоиҳаи дигар ба маблағи 602,2 миллион доллар пурра анҷом ёфта, ба марҳилаи хизматрасонии кафолатӣ гузаронида шудаанд.

Тибқи вазифаҳое, ки дар Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Маҷлиси Олӣ муайян гардидаанд, соли 2026 оғози татбиқи боз ҳашт лоиҳаи нави роҳсозӣ пешбинӣ шудааст. Арзиши умумии онҳо 334,9 миллион долларро ташкил дода, дарозии умумии роҳҳои сохташаванда ва таҷдидшаванда 286,9 километрро дар бар мегирад.

Ба рӯйхати лоиҳаҳои афзалиятнок таҷдиди роҳи Гулистон – Кӯлоб (80 миллион доллар), роҳи байналмилалии Мурғоб – Қулма (78 миллион доллар), роҳи Балҷувон – Сарихосор (58 миллион доллар), роҳи Хоруғ – Роштқалъа (38,5 миллион доллар), инчунин сохтмони роҳи даврзани шаҳри Кӯлоб (30 миллион доллар), таъмири роҳи Ваҳдат – Обигарм (28,8 миллион доллар), таҷдиди қитъаи Хистеварз – Конибодом (4,5 миллион доллар) ва сохтмони се пул дар роҳи Лабиҷар – Сангвор (17,1 миллион доллар) дохил шудаанд.

Дар айни замон дар иншооти Вазорати нақлиёт зиёда аз 1050 мутахассис фаъолият доранд, ки 75 фоизи онҳоро шаҳрвандони Ҷумҳурии Тоҷикистон ташкил медиҳанд.

Ба арзёбии гурӯҳи таҳлилгарони АИ «Корвон Иттилоот», ҷойгиршавии ҷуғрофии ҳашт лоиҳаи нави соли 2026 аҳамияти муҳими геоиқтисодӣ дорад. Навсозии роҳи Мурғоб – Қулма, ки яке аз долонҳои асосии транзитӣ бо Ҷумҳурии Мардумии Чин ба ҳисоб меравад, барои афзоиши гардиши мол миёни ду кишвар заминаи мусоид фароҳам меорад. Ҳамзамон таҷдиди роҳҳо дар Вилояти Мухтори Кӯҳистони Бадахшон ва вилояти Хатлон имконият медиҳад, ки маҳдудиятҳои мавсимии нақлиётӣ дар ноҳияҳои дурдаст бартараф гардида, марказҳои истеҳсолии дохилӣ бо бозорҳои хориҷӣ самараноктар пайваст карда шаванд.

Коршиносони АИ «Корвон Иттилоот» ҳамчунин ба ҳиссаи баланди маблағгузории грантӣ — 742,9 миллион доллар — таваҷҷуҳ зоҳир менамоянд. Ин нишондиҳанда аз сатҳи баланди эътимоди шарикони байналмилалии рушд, аз ҷумла Бонки рушди Осиё, Бонки Аврупоии Таҷдид ва Рушд ва Бонки Исломии Рушд, нисбат ба ислоҳоти соҳаи роҳу нақлиёти Тоҷикистон шаҳодат медиҳад.

Бо вуҷуди он ки ҷудо гардидани 85,1 миллион доллар аз буҷети давлатӣ дар шароити афзоиши хароҷоти давлатӣ сарбории муайянро ба миён меорад, рушди инфрасохтори муосири роҳҳо дар дурнамои миёнамуҳлат метавонад хароҷоти истифодаи нақлиётро коҳиш дода, суръати ҳамлу нақли борҳоро афзоиш диҳад ва аз ҳисоби рушди транзит ва зиёд гардидани воридоти гумрукӣ ба афзоиши даромадҳои буҷет мусоидат намояд.

АКС: Вазорати нақлиёти Ҷумҳурии Тоҷикистон