Душанбе, 19 июн, – АИ «Корвон Иттилоот». Дар шаҳри Хуҷанд 18 июн яке аз муҳимтарин рӯйдодҳои иқтисодии сол — Намоишгоҳи байналмилалии савдо ва сармоягузории «Суғд-2026» оғоз мегардад. Ин чорабинӣ барои таҳкими робитаҳои соҳибкорӣ, ҷалби сармоя, муаррифии имкониятҳои содиротӣ ва рушди ҳамкориҳои байналмилалӣ замина фароҳам меорад. Намоишгоҳ то 20 июн идома ёфта, намояндагони сохторҳои давлатӣ, доираҳои соҳибкорӣ, ташкилотҳои молиявӣ ва шарикони хориҷиро гирди ҳам меорад.

Маросими расмии ифтитоҳи намоишгоҳ дар Театри давлатии мусиқӣ-мазҳакавии ба номи Камоли Хуҷандӣ баргузор мешавад. Ҳамзамон Форуми байналмилалии «Имкониятҳои савдо ва сармоягузорӣ ва дурнамои ҳамкорӣ» доир гардида, ба майдони муҳими муҳокимаи масъалаҳои рушди ҳамкориҳои иқтисодӣ табдил хоҳад ёфт.

Тавре ташкилкунандагон таъкид мекунанд, ҳадафҳои асосии чорабинӣ дастгирии савдои байналмилалӣ, баланд бардоштани иқтидори содиротии кишвар, ҷалби сармояи хориҷӣ, воридсозии технологияҳои нав ва густариши ҳамкорӣ байни давлатҳои минтақа ва муассисаҳои байналмилалии молиявӣ мебошанд.

Дар солҳои охир вилояти Суғд мавқеи худро ҳамчун яке аз марказҳои муҳими саноатӣ ва тиҷоратии Тоҷикистон мустаҳкам намудааст. Қисми назарраси лоиҳаҳои истеҳсолии кишвар маҳз дар ин минтақа амалӣ шуда, рушди соҳибкорӣ, таъсиси корхонаҳои нав ва густариши робитаҳои иқтисодии хориҷӣ босуръат идома доранд. Аз ин рӯ, «Суғд-2026» ҳамчун воситаи муҳими муаррифии имкониятҳои сармоягузории минтақа дар сатҳи байналмилалӣ арзёбӣ мегардад.

Дар рӯзи аввали намоишгоҳ Раиси вилояти Суғд Раҷаб Аҳмадзода бо Сафири Фавқулода ва Мухтори Ҷумҳурии Мардумии Чин дар Ҷумҳурии Тоҷикистон Го Чжизюн мулоқот анҷом дод. Ҷонибҳо аз сатҳи баланди муносибатҳои Тоҷикистону Чин изҳори қаноатмандӣ намуда, масъалаҳои тавсеаи ҳамкорӣ дар бахшҳои иқтисодӣ, тиҷоратӣ ва сармоягузориро баррасӣ карданд.

Чин яке аз шарикони асосии иқтисодии Тоҷикистон ба ҳисоб рафта, вилояти Суғд яке аз минтақаҳои калидии татбиқи лоиҳаҳои муштараки ду кишвар мебошад. Аз ин рӯ, музокироти баргузоршуда ҳамчун нишонаи идомаи таваҷҷуҳи сармоягузорони хориҷӣ ба имкониятҳои иқтисодии минтақа арзёбӣ мешавад.

Коршиносон бар ин назаранд, ки дар шароити рақобати афзоянда барои ҷалби сармоя чунин форумҳо аҳамияти махсус касб мекунанд. Онҳо имконият медиҳанд, ки иқтидори иқтисодии минтақаҳо муаррифӣ гардида, робитаҳои нави соҳибкорӣ ба роҳ монда шаванд, лоиҳаҳои муштарак оғоз ёбанд ва ҷуғрофиёи ҳамкориҳои байналмилалӣ васеъ гардад.

Интизор меравад, ки натиҷаҳои намоишгоҳи «Суғд-2026» ба дастёбӣ ба созишномаҳои нав дар бахшҳои савдо, саноат, логистика, технологияҳои инноватсионӣ ва ҷалби сармоя мусоидат намуда, барои рушди устувори вилояти Суғд ва иқтисодиёти Тоҷикистон такони иловагӣ бахшанд.

АКС:Хадамоти матбуоти Раиси вилояти Суғд