Душанбе, 29 июн, – АИ «Корвон Иттилоот». Пойтахти Тоҷикистон 28 июн ба маркази таҷлили яке аз куҳантарин ҷашнҳои кишоварзии мардум — Тиргон табдил ёфт. Дар Боғи «Ирам» чорабиниҳои бошукӯҳ баргузор шуданд, ки анъанаҳои миллӣ, дастовардҳои маҷмааи агросаноатии кишвар ва мероси ғании боғдории тоҷиконро ба ҳам пайвастанд.
Рӯйдодҳои асосии ҷашн Иди зардолу ва намоишгоҳи «Хушкмеваҳои Тоҷикистон» буданд, ки иқтидори ҷумҳуриро ҳамчун яке аз истеҳсолкунандагони пешсафи маҳсулоти аз ҷиҳати экологӣ тозаи меваю сабзавот дар минтақа муаррифӣ намуданд.
Дар чорабинии идона муовини Сарвазири Ҷумҳурии Тоҷикистон Сулаймон Зиёзода, Вазири кишоварзии Ҷумҳурии Тоҷикистон Қурбон Ҳакимзода, мудири шуъбаи иқтисод ва ояндабинии дастгоҳи раиси вилояти Хатлон Ҷумахон Сафар, намояндагони корпуси дипломатӣ, роҳбарону мутахассисони соҳаи кишоварзии шаҳру ноҳияҳои кишвар, инчунин намояндагони вазорату идораҳо ва дигар ташкилоту муассисаҳои давлатӣ иштирок намуданд.
Меҳмонон аз гӯшаҳои намоиши маҳсулоти кишоварзӣ, хушкмеваҳо, ҳунарҳои мардумӣ, инчунин расму ойинҳои минтақаҳои гуногуни ҷумҳурӣ боздид намуда, бо дастовардҳои соҳаи кишоварзии мамлакат ва мероси ғании фарҳангии тоҷикон аз наздик шинос шуданд.
Муовини Сарвазири Ҷумҳурии Тоҷикистон Сулаймон Зиёзода зимни суханронӣ иштирокчиёнро ба муносибати ҷашни Тиргон табрик гуфта, таъкид намуд, ки ин ҷашни бостонӣ рамзи дӯстӣ, ваҳдат, меҳнати созанда ва эҳтиром ба об, замин ва табиат мебошад. Ба гуфтаи ӯ, ҳифзи чунин арзишҳои фарҳангӣ на танҳо барои таҳкими худшиносии миллӣ, балки барои рушди минбаъдаи кишоварзӣ ва муаррифии маҳсулоти ватанӣ низ аҳамияти муҳим дорад.
Аз субҳи барвақт кишоварзони тамоми минтақаҳои ҷумҳурӣ ороишҳои рамзиро дар шакли аҳром аз навъҳои гуногуни маҳсулоти кишоварзӣ ва беҳтарин намунаҳои ҳосили худро ба маърази намоиш гузоштанд. Дар майдонҳои намоишгоҳ даҳҳо навъи себ, гелос, шафтолу, анҷир, олуча, олу, қулфинай, инчунин харбуза, тарбуз ва дигар маҳсулоти мавсимӣ пешниҳод гардиданд.
Таваҷҷуҳи махсуси меҳмононро навъҳои гуногуни зардолуи тару тоза, ки яке аз рамзҳои асосии боғдории Тоҷикистон ба шумор меравад, инчунин маҷмуи васеи хушкмеваҳо, ки солҳои зиёд ҳамчун бренди содиротии кишвар шинохта шудаанд, ба худ ҷалб намуданд.
Қисми муҳими ҷашнро муаррифии маҳсулоти кулинарӣ ташкил дод. Ошпазону бонувони шаҳру ноҳияҳои гуногуни мамлакат аз зардолу афшураҳои табиӣ, компот ва дигар нӯшокиҳоро омода намуда, ба меҳмонон ва иштирокчиёни чорабинӣ пешниҳод карданд.
Ҳамзамон олимон ва мутахассисони соҳаи кишоварзӣ дар гӯшаҳои маърифатӣ технологияҳои муосири парвариши боғҳои зардолу, усулҳои селексия ва роҳҳои паҳн намудани ниҳолҳои босифатро муаррифӣ намуданд. Барои сокинони пойтахт инчунин ярмаркаи маҳсулоти кишоварзӣ ташкил гардид, ки дар он имкони харидории маҳсулоти тару тозаи истеҳсолкунандагони ватанӣ бо нархҳои дастрас фароҳам оварда шуд.
Қисмати фарҳангии барнома бо ҳунарнамоии дастаҳои эҷодӣ ва маросими қадрдонии беҳтарин кишоварзони кишвар, ки дар рушди соҳаи аграрӣ ва таъмини амнияти озуқавории ҷумҳурӣ саҳми назаррас гузоштаанд, анҷомбахши тантанаҳо гардид.
Имрӯз Тиргон дар баробари ҳифзи анъанаҳои куҳан мазмуни нави замонавӣ низ касб кардааст. Ин ҷашн ба минбари муассири муаррифии маҳсулоти кишоварзии ватанӣ, рушди боғдорӣ, табодули таҷрибаи касбӣ миёни истеҳсолкунандагон ва таҳкими нуфузи Тоҷикистон ҳамчун кишвари меваҳои хушсифат, хушкмеваҳо ва маҳсулоти аз ҷиҳати экологӣ тозаи кишоварзӣ табдил ёфтааст.
Акс: Хадамоти матбуоти Раиси шаҳри Душанбе