Душанбе, 19 сентябр, – АИ «Корвон Иттилоот». Дар шаҳри Самарқанд Олимпиадаи 46-уми ҷаҳонии шоҳмот таҳти сарпарастии ФИДЕ идома дорад. Дар даври дуюм дастаҳои мунтахаби мардона ва занонаи Тоҷикистон бозиҳои навбатии худро анҷом дода, натиҷаҳои гуногун ба даст оварданд.

Дастаи мардонаи Тоҷикистон дар даври дуюм бо мунтахаби Англия вохӯрд, ки дар ҳайати он як қатор гроссмейстерҳои соҳибтаҷриба ҳузур доранд. Вохӯрӣ бо ҳисоби 3:1 ба фоидаи дастаи Англия ба анҷом расид.

Дар тахтаи аввал устоди байналмилалӣ Мустафохӯҷа Ҳусенхоҷаев аз гроссмейстер Никита Витюгов мағлуб шуд. Устоди байналмилалӣ Ҷалолиддин Илҳомӣ бошад, бо гроссмейстери маъруфи англис Майкл Адамс мусовӣ кард.

Дар тахтаи сеюм устоди ФИДЕ Меҳриддин Шарифов аз гроссмейстер Ҷонс Мавороа мағлуб гардид. Устоди байналмилалӣ Муҳаммад Ҳусенхоҷаев бошад, бозии худро бо гроссмейстер Даниэл Фернандес мусовӣ анҷом дод.

Ҳамин тариқ, пас аз пирӯзии боварибахш дар даври аввал, дастаи мардонаи Тоҷикистон дар даври дуюм таҷрибаи муҳим дар рақобат бо яке аз дастаҳои пурқуввати мусобиқа ба даст овард.

Дар бахши занона мунтахаби Тоҷикистон бар дастаи Словакия бо ҳисоби 2,5:1,5 пирӯз шуд. Ин натиҷа барои шоҳмотбозони тоҷик дуюмин пирӯзии даставӣ дар ду даври аввали мусобиқа ба ҳисоб меравад.

Дар тахтаи аввал Марворӣ Насриддинзода бо WFM Люсия Серчикова мусовӣ кард. Надежда Антонова низ бозии худро бо мусовӣ анҷом дод. Ҳарифаш устоди байналмилалии соҳибтаҷриба Ева Репкова буд, ки рейтинги 2316 дорад.

Натиҷаи калидиро барои Тоҷикистон Рухшона Саидова таъмин кард. Ӯ бар WFM Виктория Надзамова пирӯз шуд. Дар тахтаи чорум Нозанин Маҳмудова бо WFM Эма Валтер мусовӣ карда, пирӯзии ниҳоии мунтахаби Тоҷикистонро дар ин вохӯрӣ таъмин намуд.

Дар даври сеюм, ки 19 сентябр баргузор мешавад, дастаи мардонаи Тоҷикистон бо мунтахаби Либия рақобат мекунад. Дастаи занона бошад, бо мунтахаби Исроил рӯ ба рӯ мешавад.

Барои ҳар ду даста бозиҳои дарпешистода марҳилаи навбатии мубориза барои ба даст овардани холҳои даставӣ ва беҳтар намудани мавқеъ дар ҷадвали мусобиқаро ташкил медиҳанд.

Олимпиадаи 46-уми ҷаҳонии шоҳмот таҳти сарпарастии ФИДЕ дар шаҳри Самарқанд баргузор шуда, дастаҳои мунтахаби кишварҳои гуногуни ҷаҳонро муттаҳид кардааст. Дастаҳои Тоҷикистон муборизаро дар даврҳои минбаъдаи муҳимтарин мусобиқаи даставӣ дар ҷаҳони шоҳмот идома медиҳанд.

АКС: Федератсияи шоҳмоти Тоҷикистон