Душанбе, 08 июл, – АИ «Корвон Иттилоот». Тоҷикистон ва Ҷумҳурии Мардумии Чин сиёсати густариши минбаъдаи шарикии стратегиро идома дода, ҳамкориҳои амалиро дар татбиқи лоиҳаҳои инфрасохторӣ, иҷтимоӣ ва иқтисодӣ тақвият мебахшанд.

Ин масъалаҳо зимни мулоқоти Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ бо Раиси Агентии Чин оид ба ҳамкориҳои рушди байналмилалӣ (CIDCA) Чэн Сяодун, ки бо сафари корӣ дар Ҷумҳурии Тоҷикистон қарор дорад, мавриди баррасӣ қарор гирифтанд.

Дар оғози мулоқот ҷонибҳо вазъи кунунӣ ва дурнамои муносибатҳои дӯстона ва ҳамкории стратегии Ҷумҳурии Тоҷикистон ва Ҷумҳурии Мардумии Чинро муҳокима намуда, аз сатҳи баланди муносибатҳои дуҷониба, ки солҳои охир пайваста рушд мекунад, изҳори қаноатмандӣ намуданд.

Муҳтарам Рустами Эмомалӣ ба ҷониби Чин барои дастгирии мунтазами татбиқи лоиҳаҳои афзалиятноки иҷтимоию иқтисодӣ дар Тоҷикистон изҳори сипос намуда, омодагии Тоҷикистонро барои тавсеаи минбаъдаи ҳамкориҳои мутақобилан судманд таъкид карданд. Зикр гардид, ки саҳми шарикони чинӣ дар татбиқи барномаҳои рушд яке аз омилҳои муҳими навсозии инфрасохтор, ҷалби сармоя ва таъмини рушди устувори иқтисоди миллӣ ба ҳисоб меравад.

Зимни мулоқот ба ҳамкорӣ бо Агентии Чин оид ба ҳамкориҳои рушди байналмилалӣ таваҷҷуҳи махсус зоҳир гардид. Ҷонибҳо аҳамияти фаъолияти CIDCA-ро дар татбиқи лоиҳаҳои иҷтимоӣ, иқтисодӣ ва инфрасохторӣ, ки ба рушди устувори Тоҷикистон мусоидат мекунанд, махсус таъкид намуданд.

Дар доираи музокирот самтҳои афзалиятноки ҳамкориҳои минбаъда, аз ҷумла энергетика, саноат, нақлиёт, кишоварзӣ, рушди инфрасохтори муосир, рақамикунонӣ, тандурустӣ, маориф, омодасозии мутахассисони баландихтисос ва татбиқи барномаҳои нави рушди иҷтимоӣ баррасӣ гардиданд. Ба таъкиди ҷонибҳо, рушди ҳамгирои ин бахшҳо имкониятҳои иловагиро барои баланд бардоштани рақобатпазирии иқтисоди миллӣ ва беҳтар намудани сатҳи зиндагии аҳолӣ фароҳам меорад.

Дар фарҷоми мулоқот ҷонибҳо омодагии худро барои таҳкими минбаъдаи ҳамкориҳои амалии Тоҷикистону Чин тасдиқ намуда, идомаи татбиқи лоиҳаҳои нави рушдро дар ҳамкорӣ бо Агентии Чин оид ба ҳамкориҳои рушди байналмилалӣ яке аз самтҳои муҳими муносибатҳои дуҷониба арзёбӣ карданд.

Ин мулоқот бори дигар собит намуд, ки шарикии стратегии Тоҷикистону Чин бо мазмуни нав ғанӣ гардида, ба яке аз омилҳои муҳими татбиқи ҳадафҳои дарозмуддати рушди устувори Ҷумҳурии Тоҷикистон табдил ёфтааст.

Акс: Хадамоти матбуоти Раиси шаҳри Душанбе