Душанбе, 21 июл, – АИ «Корвон Иттилоот». Дар доираи сафари давлатии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Муғулистон, 20 июли соли 2026 дар шаҳри Уланбатор аввалин ҷаласаи Комиссияи байниҳукуматӣ оид ба ҳамкориҳои тиҷоратию иқтисодии Ҷумҳурии Тоҷикистон ва Муғулистон баргузор гардид. Ин рӯйдод оғози марҳилаи нави густариши муносибатҳои иқтисодии ду кишвар арзёбӣ мешавад.

Ба ҷаласа Вазири кишоварзии Ҷумҳурии Тоҷикистон Қурбон Ҳакимзода ва Вазири озуқаворӣ, кишоварзӣ ва саноати сабуки Муғулистон Цагаанхуу Идэрбат ҳамчун ҳамраисон роҳбарӣ намуданд.

Зимни мулоқот ҳайатҳои ду ҷониб вазъи кунунӣ ва дурнамои рушди муносибатҳои дуҷонибаро ҳамаҷониба баррасӣ намуда, масъалаҳои ҳамкорӣ дар бахшҳои тиҷорату иқтисод, сармоягузорӣ, саноат, коркарди маҳсулоти кишоварзӣ, энергетика, нақлиёт, логистика, илм, маориф, фарҳанг ва густариши ҳамкориҳои байниминтақавиро мавриди муҳокима қарор доданд.

Таваҷҷуҳи махсус ба масъалаҳои афзоиши ҳаҷми гардиши мол миёни ду давлат, фароҳам овардани шароити мусоид барои фаъолияти соҳибкорон, ҷалби сармоягузорӣ ва татбиқи лоиҳаҳои муштарак дар бахшҳои афзалиятноки иқтисод равона гардид.

Ҳамзамон ҷонибҳо роҳҳои таҳкими долонҳои нақлиётӣ ва логистикӣ, инчунин густариши ҳамкориҳои илмӣ ва табодули таҷрибаи касбиро байни сохторҳои дахлдори ду кишвар баррасӣ намуданд.

Аз рӯи натиҷаи ҷаласа ҳамраисони Комиссияи байниҳукуматӣ Протоколи нахустин ҷаласаи Комиссияи байниҳукуматӣ оид ба ҳамкориҳои тиҷоратию иқтисодии Ҷумҳурии Тоҷикистон ва Муғулистон-ро ба имзо расониданд.

Ҷонибҳо таъкид карданд, ки таъсиси ин ниҳоди доимии ҳамоҳангсоз ба механизми муассири рушди муносибатҳои дуҷониба табдил ёфта, барои иҷрои пайдарпайи тамоми созишҳои бадастомада заминаи устувор фароҳам меорад.

Оғози фаъолияти Комиссияи байниҳукуматии Тоҷикистон ва Муғулистон нишон медиҳад, ки муколамаи сиёсӣ дар сатҳи олӣ тадриҷан бо мазмуни мушаххаси иқтисодӣ пурра мегардад. Бо дарназардошти хусусиятҳои ҳамдигарро пурракунандаи иқтисодиёти ҳар ду кишвар, бахусус дар соҳаҳои кишоварзӣ, чорводорӣ, саноати сабук ва саноати кӯҳӣ, имкониятҳои нав барои рушди ҳамкориҳои дарозмуддат ба вуҷуд меоянд.

Дар шароити тағйирёбии равандҳои иқтисоди ҷаҳонӣ чунин механизм метавонад ба диверсификатсияи бозорҳо ва таҳкими мавқеи байналмилалии ҳар ду кишвар мусоидат намояд.

Акс: Хадамоти матбуоти Вазорати кишоварзии Ҷумҳурии Тоҷикистон / НИАТ «Ховар».