Душанбе, 16 май, – АИ «Корвон Иттилоот». Тоҷикистон ва Федератсияи Русия ҳамкориҳои иқтисодии худро ба шароити муосири ҷаҳонӣ бомуваффақият мутобиқ мекунанд. Дар ин бора сарвазири Ҷумҳурии Тоҷикистон Кохир Расулзода зимни суханронӣ 15май дар ҷаласаи пленарии XVII Форуми байналмилалии иқтисодии «Русия – Ҷаҳони Ислом: Форуми Қазон» изҳор дошт.

Ба гуфтаи ӯ, Русия барои Тоҷикистон ҳамоно яке аз шарикони калидии стратегӣ ва сармоягузорӣ боқӣ мемонад. Ҳамкориҳо миёни ду кишвар дар ҳама сатҳҳо — аз сатҳи байниҳукуматӣ то сатҳи байниидоравӣ ва минтақавӣ — фаъолона рушд меёбанд.

Расулзода таъкид кард, ки ҳамкориҳои дуҷониба на танҳо нигоҳ дошта мешаванд, балки ба шароити нави иқтисоди ҷаҳонӣ мутобиқ карда мешаванд, ки ин раванд устувории табодули иқтисодиро таъмин менамояд.

Дар суханронӣ аҳамияти робитаҳо бо субъектҳои Федератсияи Русия махсус зикр гардид. Дар ин замина Ҷумҳурии Тотористон ҳамчун яке аз шарикони муҳими Тоҷикистон ном бурда шуд. Шаҳри Қазон, ба гуфтаи сарвазир, ба майдони муҳими ҳамкории амалии технологӣ ва саноатӣ табдил ёфтааст.

Самтҳои асосии ҳамкорӣ мошинсозӣ, нафту кимиё ва рақамисозӣ арзёбӣ мешаванд, ки метавонанд ба рушди минбаъдаи робитаҳои иқтисодии ду ҷониб такон диҳанд.

Ҳамзамон, сарвазир як қатор мушкилоти системавиро, ки ба ҷалби сармоя таъсир мерасонанд, зикр намуд. Аз ҷумла ноустувории бозорҳои асъорӣ ва фарқияти стандартҳои техникӣ миёни кишварҳо.

Ба гуфтаи ӯ, дар кишвар ислоҳоти институтсионалӣ идома дорад. Кодекси нави андоз ҷорӣ гардида, зиёда аз 240 намуди имтиёз барои сармоягузорон, аз ҷумла 110 имтиёзи андозӣ ва гумрукӣ пешбинӣ шудааст.

Ҳамчунин гузариш ба механизмҳои молиякунонии «сабз», барориши вомбаргҳои махсус ва таъсиси дафтарҳои муштараки лоиҳавӣ бо шарикони русӣ ҳамчун самти муҳими рушди минбаъда ном бурда шуд.

Ба гуфтаи таҳлилгарон, ин иқдомҳо ба ташаккули модели устувори рушди иқтисодӣ ва таҳкими ҳамгироии Тоҷикистон ба низоми нави молиявию иқтисодии ҷаҳонӣ мусоидат мекунанд.

АКС: https://pressa.tj