Душанбе,  5 ноябр, – АИ «Корвон Иттилоот». 4 ноябр дар Донишгоҳи славянии Русияву Тоҷикистон (ДСРТ) маросими ифтитоҳи конфронси байналмилалии илмию амалӣ таҳти унвони «Маорифи асри XXI: забони русӣ дар стратегияи рушд ба хотири ояндаи устувор» баргузор гардид. Ҳамоиш, ки то 5 ноябр идома меёбад, ба 35-солагии Истиқлоли давлатии Ҷумҳурии Тоҷикистон ва 30-солагии таъсисёбии ДСРТ бахшида шудааст.

Ташкилкунандагони конфронс Донишгоҳи дӯстии халқҳои Русия ба номи Патрис Лумумба (РУДН) ва Донишгоҳи славянии Русияву Тоҷикистон мебошанд. Ҳамоиш тақрибан 300 намояндаи муассисаҳои таълимӣ ва илмии Тоҷикистон, Русия ва дигар кишварҳоро ба ҳам оварда, барои муколамаи касбӣ, мубодилаи таҷриба ва таҳияи равишҳои муштарак дар самти рушди маорифи муосир замина фароҳам овард.

Дар меҳвари таваҷҷуҳи иштирокдорон масъалаҳои густариши ҷойгоҳи забони русӣ дар фазои ҷаҳонии маориф, такмили методикаи таълим, баланд бардоштани самаранокии идоракунии муассисаҳои таълимӣ, табдили рақамии соҳаи маориф, рушди таҳсилоти бисёрзабона ва фарогир, инчунин омода кардан ва такмили ихтисоси кадрҳои омӯзгорӣ қарор доштанд.

Забон, фарҳанг ва самтҳои нави рушди маориф

Маросими расмии ифтитоҳи конфронс бо баргузории ҷаласаи пленарӣ идома ёфт. Модератори он номзади илмҳои филологӣ, дотсент, муовини ректор оид ба корҳои тарбиявии ДСРТ Марина Русакова буд.

Ректори донишгоҳ, профессор Алексей Золотухин зимни суханронии ифтитоҳӣ таъкид намуд, ки бо вуҷуди рушди босуръати технологияҳо ва зеҳни сунъӣ, асосҳои бунёдии маориф ҳамоно дониш, фарҳанг, тафаккур ва забон боқӣ мемонанд.

«Забон на танҳо воситаи муошират, балки фазои фарҳанг, абзори илм ва василаи ҳифзи хотираи таърихӣ мебошад. Забони русӣ дар фазои таълимӣ ва илмии Иттиҳоди Давлатҳои Мустақил ҷойгоҳи махсус дошта, мардум, мактабҳои илмӣ ва наслҳои мутахассисонро ба ҳам мепайвандад», — иброз дошт Алексей Золотухин.

Ректори Донишгоҳи славянии Русияву Қирғизистон Сергей Волков низ дар бораи аҳаммияти таҳсил бо забони русӣ дар заминаи минтақавӣ сухан гуфт. Ба гуфтаи ӯ, дар Қирғизистон ҳар сеюм хонандаи мактаб бо забони русӣ таҳсил мекунад ва дар байни хонандагони синфҳои русизабон 90–95 фоизро намояндагони миллатҳои ғайрирус ташкил медиҳанд.

Дар чунин шароит масъалаи омода намудани омӯзгорони соҳибихтисос ва баланд бардоштани сатҳи касбии кадрҳои омӯзгорӣ аҳаммияти хос пайдо мекунад. Сергей Волков ҳамчунин аз таҷрибаи ҳамкории муштарак бо ҳамкасбони РУДН дар ин самт ёдовар шуд.

Муовини якуми ректор — муовини ректор оид ба фаъолияти таълимии РУДН Юлия Эбзеева тавассути паёми видеоӣ иштирокдоронро хайрамақдам гуфта, ба ҳамкорон дар татбиқи ташаббусҳои муштараки таълимӣ муваффақият орзу намуд. Намояндагони муассисаҳои таълимии Қазоқистон, Арманистон ва Беларус низ ба иштирокдорон паёмҳои табрикӣ ирсол карданд.

Аз табдили рақамии маориф то истифодаи зеҳни сунъӣ

Дар ҷаласаи пленарӣ ду маърӯза оид ба масъалаҳои мубрами рушди маориф, сиёсати забонӣ ва ҷорӣ намудани технологияҳои инноватсионӣ пешниҳод гардид.

Доктори илмҳои педагогӣ, профессор, академики Академияи таҳсилоти Ҷумҳурии Тоҷикистон Ирина Каримова дар мавзуи «Аз технологияҳои иттилоотию коммуникатсионӣ то табдили рақамӣ: рамзи навовариҳои забону фарҳанг (дар мисоли Ҷумҳурии Тоҷикистон)» маърӯза намуд.

Сардори Раёсати сиёсати таълимии РУДН, номзади илмҳои психологӣ Александра Воробёва маърӯзаи худро таҳти унвони «Маориф дар ҷаҳони номуайянӣ: аз интиқоли дониш то ташаккули натиҷаҳои таълим» пешниҳод кард.

Дар рӯзи аввали конфронс кори он аз рӯи чор самти мавзуӣ идома ёфт.

Иштирокдорон масъалаҳои идоракунии муассисаҳои таълимӣ дар шароити талаботу мушкилоти муосир, ҷойгоҳи забони русӣ дар фазои имрӯзаи маориф ва хусусиятҳои таълими фанҳо бо забони русӣ дар муҳити бисёрзабонаро баррасӣ карданд.

Самти алоҳидаи барнома ҷаласаи стратегӣ бо иштироки намояндагони донишгоҳҳои славянии Русияву Тоҷикистон ва дигар муассисаҳои ҳамкор буд, ки ба дурнамои густариши ҳамкориҳои байнидонишгоҳӣ бахшида шуда буд.

Барномаи амалии конфронс курсҳои такмили ихтисосро дар мавзуи «Табдили рақамии соҳаи маориф: рушди салоҳиятҳои омӯзгорон дар истифодаи зеҳни сунъӣ дар шароити ҷорӣ намудани технологияҳои нави таълимӣ» дар бар гирифт. Барои иштирокдорон ҳамчунин дарсҳои маҳоратомӯзӣ ва машғулиятҳои амалӣ оид ба истифодаи зеҳни сунъӣ дар фаъолияти омӯзгорӣ ташкил карда шуданд.

Аз ҷумла, машғулиятҳо таҳти унвонҳои «Истифодаи абзорҳои зеҳни сунъӣ дар омодасозии методӣ ба дарсҳо», «Истифодаи абзори Gemini Notebook аз маҷмӯи абзорҳои абрии Google for Education дар фаъолияти омӯзгорӣ» ва «Татбиқи технологияҳои зеҳни сунъӣ дар фаъолияти омӯзгори фанни забони русӣ» баргузор гардиданд.

Кори конфронс то 5 ноябр идома меёбад. Дар рӯзҳои минбаъда баргузории муҳокимаҳои касбӣ, машғулиятҳои амалӣ ва мубодилаи таҷрибаи касбӣ пешбинӣ шудааст, ки ба дарёфти роҳҳои муассири рушди маорифи муосир равона мегарданд.

Баргузории чунин ҳамоиш дар Душанбе дар заминаи таҳкими робитаҳои таълимӣ ва илмии Тоҷикистон бо Русия ва дигар кишварҳои минтақа аҳаммияти махсус дорад. Баррасии ҷойгоҳи забони русӣ, равишҳои нави омӯзгорӣ ва воситаҳои рақамӣ имкон медиҳад, ки анъанаҳои ҳамкории академӣ бо талаботи муосир ба сифати таҳсилот ва омода намудани мутахассисон пайванд дода шаванд.

Акс: хадамоти матбуоти Донишгоҳи славянии Русияву Тоҷикистон.