Душанбе, 15 май, – АИ «Корвон Иттилоот». Дар пойтахти Тоҷикистон дар шакли гибридӣ ҷаласаи байналмилалии панелӣ таҳти унвони «Аз ҳуқуқ то натиҷаҳо — тавонмандсозии занони деҳқон барои ташаккули низомҳои самараноки агроозуқаворӣ дар Аврупо ва Осиёи Марказӣ» баргузор гардид.
Ин баҳс яке аз майдонҳои муҳими мавзӯии Конфронси 35-уми минтақавии Созмони озуқа ва кишоварзии СММ (ФАО) барои Аврупо ва Осиёи Марказӣ мебошад, ки имрӯзҳо дар шаҳри Душанбе ҷараён дорад.
Чорабинӣ ба Соли байналмилалии занони деҳқон — 2026, ки аз ҷониби Маҷмаи умумии СММ эълон шудааст, бахшида гардид. Иштирокчиён таҷрибаи амалии занони деҳқон аз кишварҳои Аврупо ва Осиёи Марказӣ, дурнамои рушди биоиқтисоди устувори даврӣ ва монеаҳои системавиеро, ки занон ҳамоно дар бахши кишоварзӣ бо онҳо рӯбарӯ мешаванд, баррасӣ карданд.
Дар маркази муҳокима нақши занони деҳот дар таъмини амнияти озуқаворӣ, нигоҳдории устувории ҷомеаҳои маҳаллӣ ва рушди минтақаҳои деҳот қарор дошт. Коршиносон таъкид намуданд, ки маҳз занон дар бисёр минтақаҳо пояи асосии хоҷагиҳои оилавии деҳқонӣ ба ҳисоб мераванд, аммо нобаробарии гендерӣ дастрасии онҳоро ба замин, маблағгузорӣ, технологияҳои муосир, бозорҳои фурӯш, хизматрасониҳои машваратӣ ва таҳсилот маҳдуд месозад.
Иштирокчиёни ҷаласа қайд карданд, ки бидуни иштироки комили занон бунёди низомҳои устувор ва рақобатпазири агроозуқаворӣ ғайриимкон аст. Дар ин замина таваҷҷуҳи махсус ба зарурати ҳамгироии равиши гендерӣ дар равандҳои рақамикунонии кишоварзӣ, ҷорӣ намудани инноватсия ва рушди биоиқтисод равона гардид.
Ҳамчунин таъкид шуд, ки тавсеаи имкониятҳои иқтисодии занони деҳқон метавонад ба омили муҳими коҳиши сатҳи камбизоатӣ, баланд бардоштани шуғл ва таҳкими устувории иҷтимоии минтақаҳои деҳот табдил ёбад, махсусан дар кишварҳои Осиёи Марказӣ, ки бахши аграрӣ яке аз самтҳои асосии иқтисод маҳсуб мешавад.
Баргузории чунин баҳс дар Душанбе бозгӯи афзоиши таваҷҷуҳи созмонҳои байналмилалӣ ва кишварҳои минтақа ба масъалаҳои рушди гендерӣ дар бахши кишоварзӣ мебошад. Дар шароити тағйирёбии иқлим, дигаргуншавии бозорҳои озуқаворӣ ва зарурати навсозии соҳаи аграрӣ нақши занон дар таъмини устувории ҷомеаҳои деҳот аҳамияти ҳарчи бештари стратегӣ касб мекунад.
Акс: Агентии миллии иттилоотии Тоҷикистон «Ховар»