Душанбе, 02 сентябр, – АИ «Корвон Иттилоот».  Бонки осиёии рушд (БОР) маблағгузории 400 миллион доллари ИМА-ро дар доираи механизми махсус тасдиқ кард, ки ба навсозии нуқтаҳои гузаргоҳи сарҳадӣ, кам кардани хароҷоти нақлиётӣ-логистикӣ ва осон кардани тиҷорат дар минтақаи Ҳамкории иқтисодии минтақавии Осиёи Марказӣ (ЦАРЭС) равона шудааст. Дар ин бора Вазорати нақлиёти Ҷумҳурии Тоҷикистон хабар медиҳад.

Барномаи нави «Навсозии сарҳадҳо барои ҳамгироӣ, логистика ва рушд» (BUILD) барои дастгирии сармоягузориҳои афзалиятнок дар азнавсозии гузаргоҳҳои сарҳадӣ, таҳкими пайвастагии минтақавӣ ва баланд бардоштани рақобатпазирии кишварҳои ЦАРЭС эҷод шудааст.

Директори генералии БОР оид ба Осиёи Марказӣ ва Ғарбӣ Лия Гутиеррес аҳамияти стратегии ташаббусро таъкид кард:

«Сарҳадҳо на танҳо нуқтаҳои назоратию гузаргоҳӣ мебошанд. Онҳо дарвозаҳо барои эҷоди ҷойҳои корӣ, рушди бозорҳои минтақавӣ ва таъмини озодии ҳаракат хизмат мекунанд. Дар доираи барномаи BUILD БОР ба кишварҳои ЦАРЭС кӯмак мекунад, ки гузариш ба гузаргоҳҳои сарҳадии “ҳушманд” ва ҳамоҳангро суръат бахшанд, хароҷоти иқтисодиро кам кунанд ва долонҳои тиҷоратии фаромарзиро густариш диҳанд».

Ба гуфтаи ӯ, сарфи назар аз пешрафти назаррас дар рушди инфрасохтори нақлиётӣ, нуқтаҳои гузаргоҳ аз сабаби афзоиши ҳаҷми тиҷорат, иқтидори маҳдуди гузариш ва тартиботи кӯҳнаи назорат «ҷойҳои танго» боқӣ мемонанд. Ин боиси талафоти иқтисодӣ, таъхири борҳо, инчунин зиёд шудани хатарҳои қочоқи ғайриқонунӣ ва мушкилоти экологӣ мегардад.

Барномаи BUILD доираи васеи вазифаҳоро оид ба навсозии нуқтаҳои гузаргоҳи автомобилӣ ва роҳи оҳан фаро мегирад:

• навсозии инфрасохторӣ — муҷаҳҳаз кардани НГС бо системаҳои муосири рақамӣ ва таҷҳизоти бозрасии ҳалқаи баланд;
• соддагардонии тартибот — ҳамоҳангсозӣ ва суръатбахшии назорати сарҳадӣ-гумрукӣ барои кам кардани вақт ва арзиши интиқол;
• рушди ниҳодӣ — дастгирии ислоҳот дар соҳаи нақлиёт ва логистика, инчунин ҷалби сармоягузориҳои хусусӣ;
• дастгирии тиҷорати хурду миёна — таҳкими потенсиали ТХМ дар бахшҳои кишоварзӣ, туризм ва хизматрасониҳои нақлиётӣ барои иштирок дар тиҷорати минтақавӣ.

Тоҷикистон аз соли 1998 бо Бонки осиёии рушд бомуваффақият ҳамкорӣ мекунад. Дар давоми 28 соли шарикӣ бонк ба кишвар зиёда аз 2,7 миллиард доллари ИМА ҷудо кардааст, ки аз он беш аз 2,2 миллиард доллар маблағҳои грантии ройгонро ташкил медиҳанд.

Бо дастгирии молиявии БОР дар Тоҷикистон шоҳроҳҳои калидии аҳамияти давлатӣ ва байналмилалӣ навсозӣ шудаанд: «Обигарм — Нуробод», «Душанбе — Бохтар», «Айнӣ — Панҷакент», «Душанбе — Турсунзода» ва «Восеъ — Ховалинг».

Тасдиқи барномаи BUILD манфиатдории ниҳодҳои байналмилалии молиявиро дар таҳкими пайвастагии нақлиётӣ ва тиҷоратии Осиёи Марказӣ инъикос мекунад. 

Барои Тоҷикистон, ки таҷрибаи бисёрсолаи ҳамкорӣ бо БОР дорад, ташаббуси нав имкониятҳои иловагиро барои навсозии инфрасохтори сарҳадӣ, кам кардани хароҷоти логистикӣ ва густариши иштироки тиҷорати миллӣ дар долонҳои тиҷоратии минтақавӣ боз мекунад.

АКС: Вазорати нақлиёти ҶТ