Душанбе, 03 март, – АИ «Корвон Иттилоот». 18–19 июн дар Хуҷанд XII Намоишгоҳи байналмилалии тиҷоратӣ «Суғд-2026» баргузор мешавад. Дар ин бора маркази матбуоти Палатаи савдо ва саноати вилояти Суғд хабар дод.

Намоишгоҳ, ки аллакай 11 сол аст пайваста доир мешавад, ба дастгирии тиҷорати байналмилалӣ, баланд бардоштани потенсиали содиротии ширкатҳои тоҷикӣ, барқарор кардани ҳамкории мутақобилан судманд бо шарикони хориҷӣ, ҷалби сармоя ва ҷорӣ кардани технологияҳои муосир равона шудааст.

Дар доираи намоишгоҳ форуме бо мавзӯи тиҷорат ва сармоягузорӣ баргузор мешавад, ки дар он ширкатҳо ва корхонаҳо маҳсулоти гуногуни худро муаррифӣ мекунанд ва барои барпо кардани ҳамкорӣ ва дастрасӣ ба бозорҳои нави фурӯш созишномаҳо имзо мекунанд.

Намоишгоҳи байналмилалии тиҷоратӣ «Суғд-2025», ки аз 12 то 14 июни соли гузашта баргузор шуд, беш аз 500 иштирокчӣ аз Федератсияи Россия, Қазоқистон, Ӯзбекистон, Беларус, Эрон, Чин, Туркия, Арабистони Саудӣ ва Покистонро ҷамъ овард. Маҳсулоти худ 250 корхонаи саноатӣ аз Тоҷикистон ва кишварҳои хориҷӣ муаррифӣ карданд.

Ба гуфтаи ташкилкунандагон, «Суғд-2026» платформаи муҳим барои тақвияти робитаҳои тиҷоратӣ, мубодилаи таҷриба ва васеъ кардани ҳамкорӣ бо ташкилотҳои молиявии байналмилалӣ хоҳад буд.

АКС: Палатаи савдо ва саноати вилояти Суғд