Душанбе, 12 сентябр, – АИ «Корвон Иттилоот». Дар маркази ноҳияи Рашт — шаҳраки Ғарм — ҳайкали шоири маъруф ва чеҳраи шинохтаи адабиёти муосири тоҷик Меҳмон Бахтӣ ба истифода дода шуд.

Ин иқдом дар доираи сафари кории Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба ноҳияи Рашт ва чорабиниҳои бахшида ба 35-солагии Истиқлоли давлатии Ҷумҳурии Тоҷикистон сурат гирифт.

Дар маросими ифтитоҳи ҳайкал Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Фузайлшо Идизода, намояндаи Ҳукумати Ҷумҳурии Тоҷикистон, муовини директори Агентии захираҳои моддии давлатии назди Ҳукумати Ҷумҳурии Тоҷикистон Тоҷиддин Нурмаҳмадзода ва Раиси ноҳияи Рашт, узви Маҷлиси миллии Маҷлиси Олии Ҷумҳурии Тоҷикистон Зарина Фузайлшо Идизода иштирок намуданд.

Қарор гирифтани ҳайкали Меҳмон Бахтӣ дар маркази Ғарм танҳо як иқдоми ёдбудӣ нест. Иншооти нави фарҳангӣ ба фазои иҷтимоиву фарҳангии маркази ноҳия мазмуни тоза бахшида, ҷойгоҳи адабиёт ва аҳли қаламро дар ҳифзи хотираи таърихӣ ва арзишҳои маънавии ҷомеа бозгӯ мекунад.

Ҷовидон гардонидани номи шоир ва адиби шинохта ҳамзамон метавонад барои таҳкими ҳисси худшиносии миллӣ, арҷгузорӣ ба мероси маънавӣ ва ҷалби насли наврас ба адабиёту фарҳанги миллӣ заминаи мусоид фароҳам оварад. Дар ин замина, чунин мавзеъҳо на танҳо ҳамчун ёдгории шахсиятҳои фарҳангӣ, балки ҳамчун бахше аз муҳити тарбиявию маърифатии ҷомеа аҳамият пайдо мекунанд.

Ифтитоҳи ҳайкали Меҳмон Бахтӣ дар арафаи 35-солагии Истиқлоли давлатии Ҷумҳурии Тоҷикистон ба раванди васеътари ободонӣ ва ташкили фазоҳои нави ҷамъиятиву фарҳангӣ дар минтақаҳои кишвар пайванд мегирад. Эҷоди чунин мавзеъҳо аз таваҷҷуҳи пайваста ба рушди фарҳанг, ҳифзи хотираи таърихӣ ва гиромидошти фарзандони фарзонаи миллат шаҳодат медиҳад.

АКС: Вазорати фарҳанги Ҷумҳурии Тоҷикистон