Душанбе, 11 сентябр, – АИ «Корвон Иттилоот».  Рӯзи 23 сентябр Душанбе ба пойгоҳи баргузории Форуми байналмилалии нассоҷии «Тоҷикистон — 2026» табдил хоҳад ёфт. Чорабинӣ бо дастгирии Ҳукумати Ҷумҳурии Тоҷикистон намояндагони соҳа, сармоягузорон ва шарикони байналмилалиро барои баррасии дурнамои рушди саноати нассоҷӣ, ҷалби сармоя ва тавсеаи имкониятҳои истеҳсолии кишвар ба ҳам меорад.

Тавре Вазорати саноат ва технологияҳои нави Ҷумҳурии Тоҷикистон хабар медиҳад, форум дар ҳамкорӣ бо Федератсияи байналмилалии истеҳсолкунандагони нассоҷӣ ва дигар шарикон баргузор мегардад. Ҳадафи он фароҳам овардани майдони махсус барои муколамаи касбӣ ва сармоягузорӣ дар атрофи яке аз самтҳои ояндадори саноати миллӣ мебошад.

Дар маркази барномаи форум масъалаҳои рушди минбаъдаи бахши нассоҷӣ, табодули таҷрибаи байналмилалӣ, ҷалби сармоягузории хориҷӣ ва муаррифии имконияту зарфиятҳои соҳаи нассоҷии Тоҷикистон ба иштирокчиён қарор хоҳанд гирифт.

Аҳаммияти махсуси форум ба пешбурди модели коркарди амиқи ашёи хоми маҳаллӣ вобаста мебошад. Форуми «Тоҷикистон — 2026» ҳамчун майдони махсус барои сармоягузороне муаррифӣ мешавад, ки ба татбиқи лоиҳаҳои пурраи истеҳсолии соҳаи нассоҷӣ — аз нахи пахта то маҳсулоти тайёр таваҷҷуҳ доранд.

Чунин модел гузариш аз фурӯши афзалиятноки ашёи хом ба ташаккули занҷираҳои дарозтари истеҳсолиро дар дохили кишвар дар назар дорад. Барои Тоҷикистон ин метавонад ба афзоиши арзиши иловагии маҳсулот, тавсеаи ҳамкории саноатӣ, таъсиси ҷойҳои нави корӣ ва таҳкими мавқеи маҳсулоти нассоҷии ватанӣ дар бозорҳои содиротӣ мусоидат кунад.

Ҳамзамон, ҳамчун яке аз омилҳои ҷолиб барои сармоягузорӣ заминаи энергетикии истеҳсолоти саноатӣ арзёбӣ мешавад: 98 фоизи неруи барқи Тоҷикистон аз ҳисоби неруи барқи обии барқароршаванда истеҳсол мегардад. Дар баробари имтиёзҳои дарозмуддати андозӣ ин омил метавонад барои ширкатҳои байналмилалие, ки ба рушди истеҳсолоти дорои сатҳи нисбатан пасти партовҳои карбон нигаронида шудаанд, ҷолиб бошад.

Аз ин рӯ, форуми дарпешистода аз доираи як ҳамоиши анъанавии соҳавӣ фаротар меравад. Рӯзномаи он якбора чанд самти муҳим — коркарди саноатӣ, сармоягузорӣ, содирот, ҳамкории байналмилалии технологӣ ва истифодаи бартариҳои энергетикии Тоҷикистонро ба ҳам мепайвандад.

Барои кишваре, ки дорои заминаи истеҳсоли пахтаи худӣ ва иқтидори назарраси гидроэнергетикӣ мебошад, ташаккули занҷираи пурраи истеҳсоли нассоҷӣ метавонад яке аз воситаҳои диверсификатсияи саноат ва баланд бардоштани рақобатпазирии содироти ғайриашёи хом гардад.

Дар ин замина, Форуми байналмилалии нассоҷии «Тоҷикистон — 2026» ҳамчун майдоне арзёбӣ мешавад, ки дар он имкониятҳои соҳаи кишвар бояд бевосита ба сармоягузорони эҳтимолӣ ва шарикони байналмилалӣ муаррифӣ шаванд — аз истеҳсоли ашёи хом ва коркарди он то истеҳсоли маҳсулоти дорои арзиши иловагии бештар.

АКС: Вазорати саноат ва технологияҳои нави Ҷумҳурии Тоҷикистон