Душанбе, 11 май, – АИ «Корвон Иттилоот».  Президенти Ҷумҳурии Тоҷикистон муҳтарам Эмомалӣ Раҳмон аз 11 то 14 май бо даъвати Раиси Ҷумҳурии Мардумии Чин Си Ҷинпин бо сафари давлатӣ ба Чин сафар мекунад. Дар ин бора Вазорати корҳои хориҷии Ҷумҳурии Тоҷикистон хабар медиҳад.

Дар доираи сафар мулоқоти сатҳи олӣ баргузор шуда, ҷонибҳо доираи васеи масъалаҳои ҳамкориҳои дуҷонибаро — аз сиёсат ва тиҷорат то саноат, сармоягузорӣ ва бахши гуманитарӣ баррасӣ хоҳанд кард.

Дар маркази музокирот ҳамчунин лоиҳаҳои муштарак дар соҳаҳои энергетика, иқтисоди сабз ва технологияҳои рақамӣ қарор доранд.

Ҷонибҳо инчунин атрофи вазъи минтақа ва масъалаҳои амниятӣ, аз ҷумла ҳамкорӣ дар мубориза бо таҳдиду чолишҳои нав дар доираи созмонҳои байналмилалӣ ва минтақавӣ табодули назар менамоянд.

Аз рӯйи натиҷаҳои сафар имзои бастаи нави санадҳои дуҷониба дар назар аст, ки заминаи ҳуқуқии муносибатҳои Тоҷикистону Чинро боз ҳам густариш медиҳад.

АКС: Хадамоти матбуоти Президенти Ҷумҳурии Тоҷикистон