Душанбе, 16 апрел, – АИ «Корвон Иттилоот». Тоҷикистон ҳамкориҳоро бо ниҳодҳои молиявии байналмилалӣ густариш медиҳад: дар шаҳри Вашингтон дар ҳошияи ҷаласаҳои баҳории Хазинаи Байналмилалии Асъор (ХБА) ва Гурӯҳи Бонки Ҷаҳонӣ музокироти сатҳи баланд бо роҳбарияти Бонки Ҷаҳонӣ баргузор гардид. Дар маркази таваҷҷуҳ масъалаҳои сармоягузорӣ, устувории макроиқтисодӣ ва рушди лоиҳаҳои афзалиятноки инфрасохторӣ қарор доштанд.

Ҳайати расмии Ҷумҳурии Тоҷикистонро муовини якуми Сарвазири мамлакат Холиқзода Ҳоким Ҳикматулло роҳбарӣ намуд. Дар ҳайат ҳамчунин вазири молия Файзиддин Қаҳҳорзода, раиси Бонки миллии Тоҷикистон Фирдавс Толибзода, сафири Тоҷикистон дар ИМА Завқӣ Завқизода ва намояндаи доимии кишвар дар ХБА ва Бонки Ҷаҳонӣ Пайрав Амирзода шомил буданд.

Яке аз рӯйдодҳои муҳими сафар мулоқоти 14 апрел бо ноиби президенти Бонки Ҷаҳонӣ оид ба кишварҳои Аврупо ва Осиёи Марказӣ хонум Антонелла Бассани буд. Ҷонибҳо вазъи кунунӣ ва дурнамои ҳамкориҳои дуҷонибаро баррасӣ намуда, ба масъалаҳои ҷалби сармоягузорӣ ва татбиқи лоиҳаҳои афзалиятноки иҷтимоиву иқтисодӣ таваҷҷуҳи махсус доданд.

Таъкид гардид, ки Бонки Ҷаҳонӣ яке аз шарикони калидии стратегии Тоҷикистон боқӣ мемонад. Иштироки он дар пешбурди ислоҳоти сохторӣ, рушди инфрасохтор, таҳкими иқтидори институтсионалӣ ва таъмини рушди устувору фарогири иқтисод нақши муҳим дорад.

Дар қатори намунаҳои муваффақи ҳамкорӣ лоиҳаҳои соҳаи энергетика, аз ҷумла сохтмони Неругоҳи барқи обии «Роғун» зикр гардиданд, ки ҳамчун омили муҳими таъмини истиқлоли энергетикӣ ва рушди иқтисоди «сабз» арзёбӣ мешаванд.

Зимни муаррифии нишондиҳандаҳои макроиқтисодӣ таъкид шуд, ки ислоҳоти пайдарпай ва дастгирии шарикони байналмилалӣ ба таҳкими суботи макроиқтисодӣ ва нигоҳ доштани суръати баланди рушди иқтисодӣ мусоидат мекунад. Бо вуҷуди таъсири омилҳои беруна, рушди воқеии маҷмӯи маҳсулоти дохилии Тоҷикистон дар ду моҳи аввали соли 2026 ба 8 фоиз расидааст.

Ҳамзамон, рушди босуръати бахши бонкӣ ва раванди рақамисозии хизматрасониҳои молиявӣ низ ҳамчун нишондиҳандаи муҳими таҳаввулоти низоми молиявӣ арзёбӣ гардид. Афзоиши пардохтҳои ғайринақдӣ, тавсеаи истифодаи воситаҳои муосири пардохт ва рушди хизматрасониҳои рақамӣ аз пешрафти соҳа шаҳодат медиҳанд.

Ҷонибҳо инчунин густариши ҳамкориро дар самтҳои молияи «сабз», рушди устувор, рақамисозии бахши молиявӣ ва тақвияти фарогирии молиявӣ баррасӣ намуда, омодагии худро барои идомаи ҳамкории созанда ва дарозмуддат таъкид карданд.

Акс: Бонки миллии Тоҷикистон