Душанбе, 17 апрел, – АИ «Корвон Иттилоот». Шаҳри Красноярск охири моҳи май ба яке аз майдонҳои муҳими ҳамкории соҳибкории занони кишварҳои Созмони ҳамкории Шанхай ва Осиёи Марказӣ табдил меёбад.

Рӯзҳои 28–29 май дар ин ҷо Конфронси байналмилалии занони соҳибкори кишварҳои СҲШ ва Осиёи Марказӣ баргузор мешавад — ҳамоише, ки торафт аз доираи як чорабинии соҳавӣ берун рафта, ба абзори ташаккули робитаҳои нави иқтисодӣ дар фазои Авруосиё табдил меёбад.

Ташкилкунандагон на танҳо ба мубодилаи таҷриба, балки ба ҳамкории амалӣ низ такя мекунанд. Дар барнома суханрониҳои коршиносон ва муаррифии векторҳои инноватсионии рушди тиҷорат дар сатҳи ҷаҳонӣ пешбинӣ шудааст.

Ҳамчунин, дар ҳошияи чорабинӣ нетворкинг баргузор мегардад, ки ҳадафи он табдил додани гуфтугӯ ба робитаҳои мушаххас, шарикӣ ва лоиҳаҳои амалӣ мебошад. Дар шароити тағйирёбии босуръати моделҳои соҳибкорӣ зери таъсири рақамисозӣ, тағйироти логистикӣ ва бозорҳои нав, маҳз чунин майдонҳо нуқтаи пайвасти ташаббусҳои оянда мешаванд.

Яке аз рӯйдодҳои марказии конфронс маросими ботантанаи супоридани Ҷоизаи байналмилалии III «Леди в бизнесе» хоҳад буд. Ҳузури чунин шакли қадрдонӣ нишон медиҳад, ки ташкилкунандагон на танҳо ба муҳокима, балки ба эътирофи оммавии заноне низ аҳамият медиҳанд, ки рӯзномаи иқтисодиро дар кишварҳо ва минтақаҳои худ ташаккул медиҳанд. Ин, махсусан, дар заминаи афзоиши нақши соҳибкории занона ҳамчун манбаи рушди устувор, ҳаракати иҷтимоӣ ва ҳамкории байниминтақавӣ муҳим аст

Барандаи шом Дарья Ковалева — ноиби аввали президенти Иттиҳоди «ЦС ТПП», роҳбари шуъбаи Красноярски Суди байналмилалии арбитражи тиҷоратӣ ва дорандаи ҷоизаи байналмилалии WIN-WIN WOMEN хоҳад буд. Ин интихоб сатҳи касбии чорабиниро таъкид намуда, ба самти рӯзномаи корӣ, на расмӣ, равона будани онро нишон медиҳад.

Таҷрибаи соли гузашта миқёс ва талабот ба ин форматро тасдиқ мекунад. Он вақт ҳамоиш беш аз 350 раҳбари тиҷоратиро аз қаламрави Красноярск, минтақаҳои Русия, Чин, Муғулистон, Қазоқистон, АМА ва дигар кишварҳо муттаҳид намуд. Яъне, форум аллакай қобилияти гирд овардани на танҳо занони соҳибкор, балки доираи васеи роҳбарон, сармоягузорон ва намояндагони ҷомеаҳои тиҷоратиро собит кардааст.

Ташкилкунандагони чорабинӣ Палатаи савдо ва саноати Марказӣ-Сибирӣ бо дастгирии Палатаи савдо ва саноати Федератсияи Россия, Иттиҳоди занони Россия ва Ассотсиатсияи байниминтақавии соҳибкории занон мебошанд. Чунин ҳамкорӣ худ аз воқеияти нав дарак медиҳад: дипломатияи иқтисодӣ ҳарчи бештар на танҳо тавассути каналҳои давлатӣ ва байнидавлатӣ, балки тавассути иттиҳодияҳои касбӣ, соҳавӣ ва соҳибкории занон ташаккул меёбад.

Дар ин замина, конфронси дарпешистода дар Красноярск на танҳо ҳамчун силсилаи суханрониҳо ва маросимҳо, балки ҳамчун майдоне менамояд, ки дар он рӯзномаи васеътар шакл мегирад — аз пуштибонии роҳбарии занона то бунёди занҷираҳои нави ҳамкории байниминтақавӣ дар шароити иқтисодиёти тағйирёбандаи ҷаҳонӣ.

АКС: Палатаи савдо ва саноати Марказӣ-Сибирӣ