Душанбе, 31 октябр, – АИ «Корвон Иттилоот». Намояндаи Тоҷикистон 28 октябри соли 2026 дар ҷаласаи 17-уми Конфронси тарафҳои Конвенсияи СММ оид ба гуногунии биологӣ (COP17), ки дар шаҳри Еревани Арманистон баргузор мешавад, раиси Мақомоти ёрирасон оид ба татбиқ (SBI)-и Конвенсия интихоб гардид.

Бори аввал дар таърихи Конвенсия намояндаи як кишвари Осиёи Марказӣ ба ин вазифа интихоб мешавад. Ин рӯйдод иштироки Тоҷикистонро дар татбиқи ҳадафҳои байналмилалии ҳифзи гуногунии биологӣ ва тақвияти ҳамкории экологӣ инъикос мекунад.

Айни замон 195 давлат ва Иттиҳоди Аврупо тарафҳои Конвенсия мебошанд. Мақомоти ёрирасон оид ба татбиқ яке аз ду ниҳоди асосии ёрирасони он буда, пешрафти иҷрои уҳдадориҳои кишварҳои иштирокдорро арзёбӣ ва барои баррасӣ ба Конфронси тарафҳо тавсияҳо таҳия мекунад.

Раиси SBI раванди байниҳукуматии арзёбии татбиқи Конвенсияро ҳамоҳанг намуда, барои муайян кардани камбудиҳо ва омода кардани лоиҳаҳои қарорҳо ҷиҳати баррасӣ дар Конфронси тарафҳо мусоидат мекунад.

Дар вазифаи нав намояндаи Тоҷикистон арзёбии иҷрои Чаҳорчӯбаи ҷаҳонии гуногунии биологии Кунмин–Монреалро ҳамоҳанг карда, ба такмили механизмҳои ҳисоботдиҳӣ ва назорат мусоидат менамояд. Баррасии як қатор масъалаҳои марбут ба татбиқи Конвенсия дар ҷаласаи 18-уми Конфронси тарафҳо (COP18), ки соли 2028 баргузор шудани он пешбинӣ шудааст, идома хоҳад ёфт.

Раёсати Тоҷикистон имкони иштироки фаъолтар дар пешбурди рӯзномаи ҷаҳонии гуногунии биологӣ, аз ҷумла ҳифзи экосистемаҳои кӯҳӣ ва захираҳои обро фароҳам меорад.

Кумитаи ҳифзи муҳити зисти назди Ҳукумати Ҷумҳурии Тоҷикистон ҳамчун мақоми ваколатдори давлатӣ дар ин самт ҳамгироии ҳадафҳои экологиро ба сиёсати миллӣ ва густариши ҳамкории байналмилалиро идома медиҳад.

Акс: Кумитаи ҳифзи муҳити зисти назди Ҳукумати Ҷумҳурии Тоҷикистон