Душанбе, 02 май, – АИ «Корвон Иттилоот». Дар Вазорати рушди иқтисод ва савдои Ҷумҳурии Тоҷикистон 30 апрели соли 2026 ҷаласаи сатҳи баланди Кумитаи муштараки роҳбарикунандаи Ҳукумати Ҷумҳурии Тоҷикистон ва Созмони Милали Муттаҳид баргузор гардид. Ҷаласа таҳти раёсати вазири рушди иқтисод ва савдо Абдураҳмонзода Абдураҳмон Сафаралӣ ва Ҳамоҳангсози доимии СММ дар Тоҷикистон Парвати Рамасвами бо иштироки намояндагони вазорату идораҳои дахлдор доир шуд.
Дар ҷараёни ҷаласа таъкид гардид, ки дар доираи сиёсати хирадмандонаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, инчунин тадбирҳои Ҳукумати кишвар, ҳамкорӣ бо Созмони Милали Муттаҳид пайваста дар самтҳои рушди устувор, таҳкими сармояи инсонӣ, саноатикунонӣ, иқтисоди рақамӣ, иқтисоди «сабз» ва дигар соҳаҳои афзалиятнок густариш меёбад.
Ҳамчунин зикр шуд, ки Барномаи чорчӯбавии ҳамкории СММ дар соҳаи рушди устувор барои солҳои 2023–2026 ба афзалиятҳои Стратегияи миллии рушди Ҷумҳурии Тоҷикистон барои давраи то соли 2030, Барномаи миёнамӯҳлати рушди кишвар барои солҳои 2026–2030 ва Ҳадафҳои рушди устувор мутобиқат дошта, ҳамчун абзори муҳими татбиқи сиёсати иҷтимоию иқтисодии давлат хизмат мекунад.
Дар ин замина, Барномаи мазкур ба ҳамоҳангсозии самараноки кӯшишҳо, такмили ҳамгироии барномаҳо ва истифодаи мақсадноки захираҳо мусоидат намуда, имконият медиҳад, ки афзалиятҳои рушди кишвар дар сатҳи амалӣ самаранок татбиқ карда шаванд.
Дар поёни ҷаласа ҷонибҳо омодагии худро барои идомаи ҳамкории мутақобилан судманд, таҳкими минбаъдаи ҳамоҳангсозии барномаҳо ва сафарбар намудани захираҳои зарурӣ ҷиҳати татбиқи самараноки самтҳои афзалиятнок дар соли 2026 тасдиқ намуданд.
Дар маҷмӯъ, ҷаласа боз як маротиба собит намуд, ки ҳамкории Тоҷикистон бо Созмони Милали Муттаҳид ба сифати яке аз абзорҳои муҳими дастгирии ислоҳоти дарозмуддати миллӣ хизмат мекунад ва дар шароити таҳаввулоти иқтисодию ҷаҳонӣ аҳамияти стратегӣ дорад.
Акс: Вазорати рушди иқтисод ва савдои Ҷумҳурии Тоҷикистон